政壇：鄭家純欲上青天遊月球
政府喺上禮拜五設宴歡迎三位神九航天員景海鵬、劉旺同劉洋，難得可以近距離接觸，唔少名人都慕名而來一睹風采。一講起上太空，唔少大孖沙都表現興奮，好似新世界發展主席鄭家純話，如果第日真係搞得成太空旅行，佢都好想去月球行吓，畢竟呢個係好多人嘅夢想。最幽默嘅莫過於港交所主席周松崗，佢話從來冇諗過上太空，因為「腳踏實地」做人最好喎！
啱啱忙完家族爭產案嘅中華總商會榮譽會長霍震寰話，有機會都想上太空，但見航天員步出太空艙時步履輕鬆，笑稱自己係老人家，怕身手唔夠敏捷。講句公道話，當時記者叫住霍生嘅時候，原本向前行嘅佢即時一百八十度轉身，反應極快，一啲老態都冇。係咪已將所有煩事拋到九霄雲外？佢就笑笑口咁話一路都冇乜點樣，係嘥啲時間啫！
鄭家純（右）話有機會都想上太空行番轉，唔知到時會唔會約埋全國政協委員王國強（左）一齊去呢？