政壇：政協常委入場門檻55歲？

全國人大、政協就嚟換屆，而特首梁振英早前已辭去政協常委職務，正畀廉署調查嘅前政務司司長許仕仁，如無意外亦會自行求去，連同早年離世嘅徐展堂，形成今次至少有三個政協常委退落嚟嘅局面。據聞恒基地產主席「四叔」李兆基長子李家傑、福建幫林樹哲、廣東社團聯會主席王國強、中總會長蔡冠深、副會長「牛仔褲大王」楊釗同「新金王」黃英豪等都疑似會角逐。僧多粥少，據聞北京都覺得好頭痛，早排傳出政協有不明文規定，就係年屆七十歲或做過三屆或以上就要「退伍」，此時親中圈子又突然流傳做政協常委有新門檻，即入場門檻係五十五歲，同埋至少要做過兩屆全國政協。

有親中人士分析，若果呢個門檻係真嘅，最受影響係李家傑同黃英豪，因為兩人都未夠五十歲，即時被out出局；但亦有政界中人話，李家傑喺一眾疑似候選人中，商界背景較濃，而且對內地發展嘅支持不遺餘力，加上依家係爭做政協常委嘅關鍵時刻，唔排除有人故意放煙幕，令部分大熱人選鬆懈。