政壇：德成局長鼓吹鍵盤戰士

政府近年都幾鍾意喺互聯網收集意見，好多司局長不時都會透過網誌分享個人感受，但如果太多網上平台，有時未必係好事。好似民政事務局局長曾德成咁，除咗佢個網誌外，民政局已經有網上論壇畀大家抒發意見，但上禮拜三民政局仲喺facebook設立一個叫「民政」嘅專頁。其實德成局長淨係叫人做「鍵盤戰士」都係冇用，如果佢唔肯聽意見，就算網民啲意見有幾精闢都冇用啦。

公共事務論壇拍烏蠅

其實政府搶攻互聯網平台，全因為○九年反高鐵示威，大班後生社運人士成為抗爭生力軍，政府當時至明白，傳統嘅諮詢渠道唔能夠滿足呢班網民，所以至喺網上開設多個專頁，又搞網民對話，又搞網上論壇，都係想拉近同後生一輩網民嘅距離。

而好少落區同市民接觸嘅德成局長，尋日就喺網誌宣布，話局方最近開設咗個叫「民政」嘅facebook專頁，希望同市民溝通交流吓。但其實同後生仔接觸，互聯網唔一定係金科玉律嘅，好似局方成立咗幾年嘅網上「公共事務論壇」，都起唔到乜嘢作用，咁多年嚟都係得七百五十個討論議題，九千幾個回應，好似好多，但心水清嘅人就知，一個人氣熱爆嘅討論區，分分鐘一個鐘已經有成千個回應啦！

德成局長搞咁多網上平台，擺明係鼓吹網民做「鍵盤戰士」，叫佢哋上網打幾隻字發表意見就算數，但呢種諮詢方式根本收唔到效用，點解局長仲要繼續？如果佢真係咁得閒，不如真正落區聽吓意見好過啦，好似近排奧運咁，德成局長都可以同班體育團體見吓面，聽吓佢哋有乜嘢訴求，咁樣唔係仲針對性、高效率咩？