政壇：屎橋杜絕種票泛民捉蟲

區議會選舉種票風波愈揭愈臭，令人質疑有人有系統大規模咁種票，幫建制派對付泛民主派。喺區選中大敗嘅白鴿黨主席鐵頭仁同公文袋黨魁袋巾傑，近日就揸住有關個案向當局窮追猛打，包括建議今後選民登記須提供住址證明，以杜絕呢類種票行為。

但有政府中人話，所有年滿十八歲嘅香港永久性居民都有權登記做選民，但好多都係未出嚟做嘢嘅年輕選民，本身並冇住址證明；即使家長唔怕煩肯提供文件證實雙方關係，亦證明唔到佢哋真係一齊住，好麻煩同複雜；若嚴厲推行有關建議，肯定會大大降低合資格市民登記做選民嘅比率，仲滋生其他好多行政同法律問題，相信建議最後都會不了了之。

相反建制派就對建議不表抗拒。有建制派中人分析，對於佢哋「鐵票」支持者，就絕對難唔到佢哋，建制派有錢又有人，大可派員幫支持者搞住址證明。反觀啲游離票同泛民支持者，向來黨性較弱，隨時因怕煩而唔登記，最後又係益咗建制派。咁即係話泛民分分鐘捉蟲喇！