政壇：曾志偉：中指向胡打密碼

中央電視台日前播出中國文學藝術界聯合會第九次全國代表大會（文代會）嘅開會片段，影到本港藝人曾志偉喺國家主席胡錦濤發表講話期間，將右手放喺枱面並伸出中指，疑似指向主席台。片段畀兩地網民瘋傳，並揣測係同內地打壓藝人喺電視廣告代言有關。曾志偉尋日連忙透過傳媒澄清事件，話可能當時只係示意服務員添茶喎，真係信不信由你。

擔任台灣金馬獎頒獎禮主持嘅曾志偉尋日到咗台灣，立即畀人追問今次「比中指」風波，起初佢仲講笑話「我是在打摩斯密碼給胡錦濤打pass（暗號）」，隨後又澄清可能當時只係示意服務員添茶，強調自己冇任何唔禮貌嘅意思，未諗過因而畀人瘋狂轉載，成為「重要人物」。

問會唔會擔心今次唔再獲邀出席文代會，佢好有信心咁話唔擔心，相信對方一定會再請佢，仲話：「有我，才會有話題。」咁又係嘅，今次呢單「比中指」風波，就真係成為咗中港台都關注嘅話題喇！