政情：魔鬼交易員赴華搵筍工？

中國企業近年經常喺衍生工具交易市場同國際大行博弈，總係輸多贏少，但無論喺東航、國航抑或中國遠洋等央企發生嘅金融醜聞，都好少有人受到牽連，更莫講話因為咁而踎監。有「魔鬼交易員」之稱嘅利森接受內地媒體訪問時，直言對此感到吃驚，仲好感慨咁爆咗句：「睇嚟，我應該去中國搵份工。」

年輕一輩可能唔識利森，話說喺九五年，呢位霸菱外匯交易員連累公司輸咗8.6億英鎊，最終將呢間有二百三十年歷史嘅金融老店送上清盤路，利森要為事件入獄，轟動全球。

提起進行違規衍生交易輸大錢嘅內地央企高管，中航油新加坡公司總裁陳久霖算係唯一一個，因為輸咗5.5億美元而喺新加坡坐監，但佢出獄一年之後，就喺舊年去咗間央企嘅子公司做總經理。對於陳久霖可以翻身，已飽歷風霜同遭人白眼嘅利森自然感慨良多，佢話：「如果件事唔係發生喺中航油新加坡公司，而係喺內地嘅公司，結局係唔會唔同呢？」