靚靚爆蔡一傑知衰死晒狗

蔡一傑昨日涉嫌醉駕被捕，其價值逾200萬元的Bentley房車幾近撞成廢鐵！原來撞車前12小時，他相約好友伍詠薇與袁詠儀（靚靚）晚膳，靚靚得悉傑仔出事後即時致電慰問，並指傑仔把聲似死狗！

現年44歲的男子組合草蜢成員蔡一傑，前晚在好友伍詠薇（伍姑娘）寓所飲大兩杯，駕車返家途中剷上行人路受輕傷。接受酒精測試後，他被測出體內酒精含量超標，即時被捕，其後獲准保釋。

力撐「安全先生」

原來傑仔出事前12小時，相約伍姑娘與其夫練海棠、靚靚及其兒子「魔童」一行5人晚膳，傑仔飯後未捨得歸家，到伍姑娘家繼續把酒談歡，而靚靚則帶囝囝先行離開。記者昨日致電靚靚了解，她得悉傑仔涉醉駕後坦言始料不及，問到有否致電對方，她說：「有呀！佢電話把聲有少少死狗，佢知道自己錯喇！畀啲時間佢休息吓啦！」

她力撐傑仔只是無心之失：「我睇到新聞都好突然，因為佢揸車不嬲好小心，係一個安全先生，我知佢唔係一個爛醉嘅人！佢唔係去伍姑娘屋企劈酒，只係把酒談心，一定唔會飲得太多，可能只係酒氣未過，加上大清早冇瞓過有倦意，判斷力有啲問題啫！佢絕對唔係一個不負責任嘅醉駕者，亦唔係一個亂嚟嘅人！」

蘇志威拒回應

靚靚認為傑仔「冇事」及沒有途人受傷，已屬不幸中之大幸，望對方吸取教訓：「無論飲幾多都唔應該揸車，要改搭交通工具！」問到會否擔心藝人醉駕會被重判？她再力撐：「唔係因為朋友先幫佢，佢只係初犯，有良好嘅駕駛紀錄！」至於傑仔拍檔蘇志威則透過SMS表示，事件已交由警方處理，不便評論。

近年草蜢舉行多場演唱會，帶挈傑仔豬籠入水，除豪買價值200多萬元的Bentley房車外，又租住薄扶林道Dor Fook Mansion豪宅。有份主持無綫遊戲節目《華麗明星賽》的他，更曾自爆每集倒貼10萬元購買名牌服飾開工，若以15集計算，最少要花150萬元！