政情：搞搞政：社記艾未未Tee中港合製

內地維權藝術家艾未未神秘失蹤近一個月，唔少關心內地人權狀況嘅組織已發起浪接浪嘅行動，爭取內地盡快釋放呢位藝術家。社記見機不可失，近日都印製咗一批艾未未T恤，宣揚訊息之餘，又可以籌款。

副主席吳文遠話呢件艾未未T恤盛惠一舊水，暫時印咗一百件，而為咗降低成本，佢哋一如以往喺內地印製，但平極成本都要七十蚊件，原本同佢哋一直合作開嘅內地廠商，亦唔敢印啲寫住「茉莉花革命」字樣嘅製品，搞到佢哋要拎晒啲T恤返港加工印「聲援艾未未」同「茉莉花革命」等字句，結果令成本大漲。咁即係話呢件Ｔ恤一半內地製造一半香港製造。

雖然反應唔錯，但隨住件T恤曝光，內地廠家極有機會唔肯再生產，即係隨時絕版。吳文遠好無奈咁話即使係咁都冇辦法，如果成個生產過程都喺香港進行，成本定升到過百蚊件，到時即使反應好都未必有機會再出。