政情：市建觀塘搬樹驚動林鄭
喺觀塘月華街嘅一棵有五十八年歷史嘅榕樹，受巿區重建局觀塘重建項目影響要「讓路」，尋日凌晨移樹僅僅十七公尺，都要出動過百工人，巿區重建局主席張震遠同班高層全程
到實，捱眼瞓由凌晨兩點一直等到朝早六點棵樹安頓好至走，連發展局局長林鄭月娥都半夜三更趕嚟視察，逗留咗大約四十五分鐘。
熱到身水身汗嘅張震遠話今次搬樹工程浩大，棵樹高成二十公尺，足足七層樓咁高，大樹連泥土成三百噸重，即係成架七四七飛機嘅重量，仲係本港首次使用路軌移除法移樹，所以一定要嚴陣以待喎。呢棵細葉榕唔算係老樹，唔喺古樹名冊內，但佢話棵樹形態好美，加上居民又對佢有感情，所以決定將佢留落嚟。
巿建局凌晨搬月華街榕樹，非常大陣仗。
林鄭月娥（左）同張震遠（中）到現場視察。