政情：虎現觀瀾湖萬人捧場
美國高球名將老虎活士復出後四圍出戰，早前仲應邀到深圳觀瀾湖參觀，觀瀾湖太子爺朱鼎耀（Tenniel）負責搞呢件盛事，呢場大騷吸引咗成萬個老虎粉絲捧場，幸好當日都秩序井然，朱鼎耀可算飲得杯落。
呢日老虎到訪觀瀾湖僅十六個鐘，仲近距離走近球迷示範球技，萬個粉絲梗係睇到眼定定喇，忙完呢件事之後，觀瀾湖又迎來「龍傳基金」慈善高球賽，朱家兄弟真係冇時停。
一切完成後，Tenniel日前更遠赴杜拜，代爸爸朱樹豪接受畢馬威高爾夫商務論壇（KPMG）頒發嘅終身成就獎。佢話，爸爸係首個華人得到KPMG頒發終身成就獎榮譽，覺得與有榮焉，佢仲盛讚爸爸比佢哋兩兄弟忙百倍，所以畀佢哋兩兄弟好大動力。
