政情：搞搞政：「小明」當紅呻壓力大
由兒科醫生進身為兒歌紅歌手嘅李家仁，一變成為樂壇當紅炸子雞，一曲《小明上廣州》不但令佢「歌壇樂同遊」，李醫生獲邀訪問、檔期等如雪球滾來，搞到佢都呻沉重壓力，甚至能夠明白藝人濫藥減壓嘅內心世界。
唔係嘛？李醫生解釋，當人有首歌紅咗，自然唔想第二首衰，何況人氣急升，就有好多人訪問你，甚至被狗仔隊跟。李醫生仲話，佢仲試過有人畀張影住佢瞓覺嘅相話「小明睡覺了」，原來佢喺地鐵畀人影到搭車瞓着覺。
變咗紅歌手後，好多人搵佢開Show義唱，李醫生向作曲人韋然求救，韋然教佢好似莫華倫咁，有人搵你，你就話以你名義捐錢畀慈善機構先，咁啲冇咁有誠意嘅人就會縮沙。李醫生問韋然應該捐幾多先夠，韋然諗一諗，莫華倫就係五萬，咁李醫生應該係八千！
