政情：張朝陽豪買400萬法拉利
內地已成為世界奢侈品嘅消費大國，一擲萬金追求心愛物已經好平常，內地三大互聯網之一嘅搜狐董事局主席張朝陽尋日就好豪氣咁買咗架法拉利，冇耐仲喺微博公開架車嘅性能，佢仲計劃將呢架價值四百萬元人民幣嘅新玩具運去海南島添。
張朝陽旗下嘅互聯網報道佢尋日參觀二○一一上海車展，喺法拉利攤位前，佢仲試坐及用手機拍攝，冇耐佢就喺自己嘅微博宣布，啱啱買咗架車，呢架車「排量4.3，百公里加速四秒以內，馬力達四百六十匹」，佢仲打算將架車運去海南揸，因為當地空氣好，揸開篷車舒服啲。睇嚟，張朝陽雖然豪情買咗心頭好，但北京、上海等大城市嘅空氣唔夠好，佢都冇打算喺當地揸，以後要玩新玩具，仲要搭飛機噃！
張朝陽尋日買咗架法拉利做新玩具。 （資料圖片）