政情：平叔眼冤炮轟三副局

政府引入副局長多時，唔少副局嘅表現卻令人冇眼睇，退出官場後屢次重炮狂轟政府嘅王永平尋日又炮打三個副局長，佢哋就係近日喺幾宗焦點事件如港珠澳大橋環評、教科書、加汽車首次登記稅表現太差嘅環境局副局長潘潔、教育局副局長陳維安同運輸及房屋局副局長邱誠武。

潘潔當日話官司進行緊，無可奉告，事後又連上立法會交代都唔敢，平叔話，佢嘅表現完全反映佢擔心講錯嘢，二來根本係唔熟書。至於陳維安，平叔更即刻拆穿佢嘅西洋鏡，直言將課本同教材分拆係解決唔到問題，應該要打破壟斷先得。譬如由當局訂好課程後，就去全球招標書商印書，再唔係就由教院或政府自己落手製作教材，或由政府成立基金，資助辦學團體製作教材，總之就係要大刀闊斧。愈鬧愈過癮下，講加車稅出事嘅邱誠武都冇得走雞，平叔有啲不屑話，政府唔應加車稅，反正車稅只係針對買車嘅人，而有車同用車係兩回事，所以政府應攞啲數據出來畀人睇吓先至下定論。言下之意，副局長唔識打有準備嘅仗，言論又閃縮，點怪得人哋批評呢？