近年社會上出現了不少次文化用語，像「毒男」一詞，便是用來形容無論是形象和行徑，都不受一眾港女歡迎，以致缺乏異性緣的男子，所謂「心病還需心藥醫」，唔想畀人叫毒男，咁就要快啲解毒先得喇！
多看潮流雜誌，提升潮流觸覺。
改變邋遢形象
正所謂「人靠衣裝」，想要人留意你，形象好緊要。可是這不代表要靠名牌裝身，只要多睇潮流雜誌、多行街逛時裝店，留意街上潮男的衣着配搭，都對你有一定幫助。想徹底改變形象，除了衣着，恤埋個靚髮，更是不可或缺。以前着開又霉又舊的殘衣，唔該統統丟進垃圾桶。
注意個人衞生
頭髮不是蓬鬆凌亂，就是一餅嘢咁漿住晒，滿面油光，一直蔓延至眼鏡片上，指甲又長又綑晒黑邊，加上經常連續幾日着同一件衫，身上發出酸臭異味，係人見到都彈開啦！要洗脫污名，就要從良好個人衞生習慣做起，每日刷牙洗臉、沖涼洗頭及定期修剪指甲，絕對唔可以懶。
抽時間做運動
經常屈在家中，沉迷於動漫或電腦虛擬世界，對身心一啲都唔健康。有時間就應該做吓運動，透過正常排汗，將積聚於體內嘅「毒素」排出，唔單止人會健康啲，病痛同暗瘡都會少啲，皮膚好咗，人都變得開朗，自信都跟住返嚟啦。
參與義務工作
與其成日收埋自己，匿响屋企，倒不如做番啲有意義嘅事，參加義工活動，幫到人又幫到自己。可直接擴闊社交圈子，結識真正面對面相處嘅朋友，打破網友比朋友多的局面，建立健康而又精彩的社交生活。
進修提升自己
經常以打字代替說話，說話時不敢正視別人，覺得學歷比唔上人，往往是自卑心作祟所致。正所謂「人生有幾多個十年」，好應該趁年輕報讀課程進修，擴闊視野，Upgrade自己，仲點會成日「思思縮縮」。
Tips：擺低部腦
毒男源自日語漢字「獨男」，泛指欠缺異性緣、缺乏正常社交生活，沉淪「毒網」包括網上漫畫、動漫遊戲等虛擬世界，脫離現實的單身男性。因經常坐在電腦面前，平時甚少出街，嚴重者更甚少走出房門，久而久之致「中毒」太深，不能自拔。最直接的「解毒」方法，還是向「毒腦」說不。學楊千嬅話齋：「『抬起你低過的頭來』」又有何難。
專家有Say：別只為討好女人而改變
素有「人生教練」之稱的Winnie指：「據我理解，所謂『毒男』，好聽就是欠缺異性緣，俗一些講即是『乞女憎』嘅男人。他們予人形象是斤斤計較、懦弱、自卑變自大，最需要是心態調整，而不是做些甚麼去改變。斤斤計較無非怕蝕底，出發點是貧乏。嘗試多些無條件付出，就會發現原來付出得多，反而有機會收穫更大，因為付出並不代表蝕底，而是一個動力讓自己前進。懦弱基於安全，安全因為舒服，太舒服就會懶惰，因而缺乏冒險精神，愈發覺得自己不可以成事。唯一可以改善，就是願意為自己所作所為付出代價和負責任，盡地一煲去冒險，不怕失敗。自卑變自大方面，大方承認和勇敢接受自己短處和討厭的一面，學會自我嘲笑就不用再費力氣去抗拒自己然後『裝B』，因為當你愈要強裝自大的時候，其實全世界偏偏只見到你最低能的一面。」此外，Winnie亦提醒大家：「無論要改善甚麼都好，千萬別為了討好女人而做，是為了自己呀！」
