無綫劇《金枝慾孽貳》初戰失利，首周收視比處境劇更低，劇中飾演水火不容的姊妹、女主角鄧萃雯與伍詠薇，對收視欠佳的反應亦同樣南轅北轍！雯女置身事外隔岸觀火，更狂轟無綫沒找她宣傳；伍姑娘則出錢出力，拉埋近期因與郭富城傳緋聞而人氣勁升的苟芸慧上床力谷！
鄧萃雯炮轟《金枝貳》冇劇本，連演員都睇唔明，何況係觀眾！
伍詠薇連日搞活動谷劇，與雯女的態度南轅北轍！
苟芸慧指新劇拍攝手法特別，細心欣賞才能領略。
無綫重頭劇《金枝慾孽貳》首周平均收視只得23點，甚至低過處境劇《愛．回家》。對於收視低迷，劇中飾演姊妹「鬥餐死」的鄧萃雯及伍詠薇，戲外對收視低開的反應亦各有姿態！雯女全程置身事外，闊佬懶理，反觀伍姑娘出盡全力谷收視，更不惜拉埋近期因與郭富城傳緋聞而人氣勁升的苟芸慧晒床照，名副其實瞓身盡谷！
預咗觀眾睇唔明
昨日，雯女出席慈善活動時被問到《金枝貳》收視欠佳，最先輕鬆回應：「我做唔到啲咩，盡力而為啦！（咁輕鬆？）收視我唔會理，收視唔得係有啲失望，始終萬眾期待！」但當問到為何未有拍攝早前的宣傳短片時，她即寸爆：「關我咩事！」又透露並非自己唔拍，而是冇人找她拍：「我好被動，但冇人叫我拍，我都有啲意外！可能佢哋拍夠晒啲片，唔使再叫我啦！」至於有指觀眾睇唔明《金枝貳》，雯女即發炮狂轟：「睇唔明都預咗，佢哋（監製戚其義、編審周旭明）作品一向都係咁！如果突然睇得明，係佢哋改咗風格！（演員都睇唔明？）零劇本，梗係唔明啦！如果早啲有劇本，有時間參詳會好好多！」
雖然雯女看似一肚火，但仍希望收視愈來愈好，又指如獲邀請的話，有時間定會出席劇集宣傳。不過，據知剛誕下二女後未有公開露面的蔡少芬，將出席《金枝貳》宣傳谷收視，而雯女則因有工作而未能出席。其實雙方關係起變化，有消息指因雯女早前推無綫新劇《Aerobic Girls》而關係變僵。對此，記者向無綫外事部副總監曾醒明求證，他說：「無綫絕對唔會待薄雯女，之前陳豪佢哋拍嘅宣傳係即興，Ada（蔡少芬）都唔喺度啦！佢哋都係女主角，一定搵佢哋宣傳。」
反觀另一女主角伍姑娘則非常落力催谷收視，除了日前搞酒店派對睇首播，前晚再度搞酒店派對，誠邀劇中好友再追劇，更將與苟姑娘的床照及其他女演員的香艷浴袍Look上載到微博益街坊！她在微博中不斷硬銷是「金枝2之開房周記Part2」，落力宣傳吸引Ada留言，她笑言下次一定要預埋Ada，還豪言第三次酒店派對將住得更高級！
撐拍攝手法特別
另外，苟姑娘前晚出席i.T活動時否認，透過緋聞男友城城認識沈嘉偉：「工作係公司安排，我唔認識沈生。」她又否認如傳聞所指般見過城母，又不認為城城經理人小美是想利用她令「富黛」分手。對於《金枝貳》收視失利，她力撐說：「拍攝手法比較特別，要慢慢欣賞，當電影咁睇！」
第一手消息請下載on.cc東方互動
