Fundman睇市：內房股隨時炒一轉

近期A股愈走愈強，滬綜指已經連升多日，牛到爆燈，主要係人行繼續逆回購，變相放水。不過本地搵食的基金大戶，似乎唔多信A股可以癲好耐，近期恒生AH股溢價指數由120升番上132.8水平，已差不多番到去今年一月中高位134.5，A股狂升H股慢升下，A股已經貴H股三成三。

內地券商唱到行，短期滬綜指睇四千點，今次大媽與基金經理邊個睇啱市，相信好快有答案。至於話會唔會因A股狂升帶起番H股，由大行做的基金經理調查報告顯示，大部分有水浸情況所見，這個可能性不能抹殺，且看今次港股可否趁機會解決多年與兩萬五點阻力糾纏不清的關係。

基金水浸尋出路

一旦基金經理要急急解決手上現金過多的問題，可以預期交易深度夠的大市值國企，會較先得益。在國企重組及一帶一路概念下，電訊、石油、鐵路、基建及建築股都可以睇高一線，短期值得優先考慮。

對樓市由壓抑到托市不遺餘力，中央態度一百八十度轉變，理論上，政府唔畀樓市死，減息或多或少紓緩了這個高財務桿槓行業的利息成本壓力，內房股理應可以有驚無險咁渡過今個周期，惟獨今次情況同○九年不大一樣，內房企業面對市場環境較以前複雜，例如三、四線城市落成量遠超過市場需求，引發價格戰線漫長，並非阿爺兩三句說話可以解決。

另一點，是當人民幣唔係必然兌美元升值。以往上市內房企業透過發美元債集資，息口隨時去到10厘甚至15厘，主理人計過度過，人民幣升值令債務變相貶值，最後都係除笨有精。

美元債務變負累

不過，今時唔同往日，依家手頭上已發行的美元債，隨時因人民幣貶值，引致每年要為債券重估，為業績帶來匯兌損失，故去年十一月人行減息至今，內房股表現比預期遜色，強如兩隻藍籌內房中海（00688）及華潤置地（01109），若然是在人行十一月減息後第一個星期一裂口開高後追入，揸到今日分別輸2.6%及賺8.2%，再睇其他內房，都有類似贏輸參半情況，就算贏，都係有限數，同減息內房必升的傳統想法在有些少出入。

富力地產（02777）上周跌至五十二周低，皆因上市以來首次業績唔派息，更弊嘅係，去槓桿會係今年內房股的一大趨勢。

兩會對樓市着墨不多，市場預期中央樓市政策今年都唔會有太大調整，反而鬆綁房貸及放鬆限購措施，預期會在各地方陸續出台。或者因為樓市托極唔起，最近內地媒體吹風，部分一線城市為鼓勵改善性住房需求，支持二套房貸，正研究減低稅費的措施，看來在保增長的大前提下，中央不能不讓內地樓市升溫，以推動財富效應支持經濟。

考慮到內地減息以來升得唔多，無論由貪平出發，抑或係純炒政策出台，內房股都應該有得諗吓，雅居樂（03383）上周突見異動，可以留意，另外在下心水仲有世茂房地產（00813）、保利置業（00119）以及碧桂園（02007）。