股海實戰：威高升勢可持續

大型藍籌近日陸續公布業績，騰訊（00700）周四公布業績後急升，周五輪到平保（02318）接力，股價一度創93.4元一年新高，收市雖然略為回落至92.1元，但全日仍然升4.06%，阿莊之前都有叫大家吼低買入平保，如果有跟進的話，唔使兩個星期，無驚無險就有超過一成的進帳，而業績後瑞信及滙豐都上調平保目標價至120元，睇佢周五走勢，短期要突破100元大關應該唔係問題，所以不妨繼續持有。

大市周五雖然有回吐，但市場不乏炒作焦點，近日呈強的阿里系，周五輪到隻阿里健康（00241）接力，股價急升11.14%，以6.78元收市。至於中資券商股亦隨內地股市做好，中信証券（06030）、海通證券（06837）均升逾4%，至於中國銀河（06881）亦升6.21%，由於中資券商股沉寂已有一段時間，上周開始先至有番少少鑊氣，睇格局仲有得去，不妨順勢跟進。

至於隻廈門港務（03378），原本諗住喺2元樓下買，但係平開之後無回頭，阿莊見勢色有啲唔對路，於是以平均價2.03元追入咗10萬股。

威高股份（01066）上周三已公布業績，但係周四無乜表現，反而周五先至有異動，股價升7.79%以6.5元收市，反應似乎慢咗少少。集團截至去年十二月底止的年度業績，錄得收入52.77億元（人民幣．下同），按年升14.4%，不計特殊項目，股東應佔純利有9.88億元，增11%。

期內集團的三大業務，包括常規耗材醫療製品、骨科及血液透析耗材與設備的營業額均錄得增長，分別上升11.6%、17%及29.9%，而單計第四季，集團的整體銷售按年升22%，表現較預期強勁，今年首季預期可延續第四季的強勁表現。

上月集團宣布分骨科業務在港上市，市場對分拆普遍持正面態度，認為可釋放業務價值之餘，亦可籌集更多資金作發展之用，市場更估計，威高下一步將會分拆血液淨化耗材業務上市。

威高股價在低位徘徊已有一段時間，周五初現突破，料短期升勢持續，目標可望挑戰250日線7.31元，阿莊今日會吼位追入2萬股，止蝕6.15元。