股海實戰：中國燃氣可趁低吸

上個禮拜，好友精心部署炒個市上去，點知瑞郎失驚無神脫鈎，打亂了好友的計劃，恒指再次由橫行阻力區頂部回落，但係禮拜五晚歐美市場好似無事發生過咁，歐洲三大股市全線上升，道指升近二百點，睇嚟港股今日有機會再次挑戰24,300點阻力。

保險股大漲小回格

周五大市跌二百幾點，市場整體氣氛麻麻，全日主板下跌股票多達873隻，升的只有428隻，加上內房近日連番有不利消息傳出，亦打擊投資者信心。事實上，阿莊覺得港股呢排只係表面風光，雖然指數升、成交大，但只係集中在個別重磅股身上，好多股份都無跟升。

內地股市上周五持續做好，而本港上市的內險股亦繼續呈強，平保（02318）、國壽（02628）及新華保險（01336）均逆市創五十二周新高，相信在多項利好消息配合下，保險股短期仍屬大漲小回格局。

另外，油價周五顯著反彈，預期可帶動三大油股今日做好，至於油田服務股相信亦有機會反彈，不妨留意。但阿莊覺得油價整體弱勢依然未改，博入相關股份宜見好就收。

燃氣股周五逆市企穩，中國燃氣（00384）收報11.96元，無升跌。集團自去年十一月公布中期業績後，股價由15元水平反覆回落，但股價於12元以下水平開始現承接。事實上，中燃截至去年九月底止的中期業績，錄得純利16.8億元，按年升31%，表現不俗，同時去年底宣布向主要股東北京控股（00392）收購於內地從事城市燃氣及車用天然氣分銷及天然氣長輸管線建設，擁有十二個城市燃氣項目的北燃發展全部權益，可進一步鞏固集團在燃氣市場的地位。

中燃預期由今年至二○二一年，燃氣銷售可大增兩倍，換言之，集團未來仍會處於高增長期，潛力可觀，近日股價回落，正好提供長線吸納機會，因此阿莊計劃分段在12元以下收集作長線持有。至於上周五則按原定計劃，以均價1元成功購入10萬股航天控股（00031）。