股海實戰：華創只宜候整固低吸

早幾年一位卜架朋友轉到對沖基金公司工作，初初都幾好景，但近年見親佢都鞋鞋聲，上周見面才知道佢已離職做番自由人。事實上，魚缸每日四、五億嘅成交額，實在難以養活整個行業，始終有批人要被迫離場。據統計，去年對沖基金平均投資回報率僅單位數字，甚至低於股債比例六四開嘅被動型基金，咁仲邊有人有興趣投資對沖基金？再講，好似呢期指數好似轉好，但實際上係低成交乾挾，炒家多半只係游走於不同板塊炒上落，過日辰還可以，搵唔到大錢，對於追求絕對回報嘅對沖基金，實在難有發揮空間。

講番板塊表現，假前交易日風電股有鑊氣，華電福新（00816）、大唐新能源（01798）及華能新能源（00958）升幅介乎2至5%。大行里昂話風電行業嘅使用率同回報持續改善，故睇好相關股份，首選係龍源（00916），並將華電福新目標價提高33%至2.4元。阿莊始終擔心風電股再炒高一浸會有抽水行動，建議盡量避免高追，跟炒宜嚴限注碼。

此外，睇番四月份藍籌股表現，華潤創業（00291）一洗頹風，股價由上月下旬低位22.55元反彈上本周二高位見26.6元，累升近18%，雖然相距年初高位29.15元還有一段距離，但近日其10日線已一連重上50日及250日線，技術上走勢確有所改善，只是14日RSI已升至69，短線料有整固，支持區已上移至24.5至25.5元水平。

強化啤酒市場布局

去年，華創嘅核心利潤下跌，主要係受去年末季零售業務虧損拖累。今年公司策略將重點放番喺改善零售業務盈利能力同加強重點市場嘅競爭力。雖然收購金威（00124）嘅啤酒資產交易料於年底前才完成，作價亦唔算平，但長遠有助華創加強喺廣東、成都及天津市場嘅佈局，完善全國市場覆蓋面。展望今年，整體盈利復甦須時，但相信核心盈利能重現增長動力。雖然華創股價四月份止跌回升，只是以現價計，一三年預測市盈率亦同樣升至31倍，說實話估值未算特別吸引，相信股價喺27元樓上會有沽壓，建議待整固出現再作考慮。