工商樓市死寂，連近年最旺嘅九龍東商廈樓，唔少商廈業主密密劈價吸客，減幅有12至17%，但點都撻唔着買家嘅興趣。代理估計，上個月區內商廈買賣僅10餘宗，按月減幅擴大到近50%。區內今年會有兩個商廈樓花大盤推售，亦有商廈放盤除減價，仲有加佣、加長成交期希望盡快出貨，好似觀塘皇廷廣場中層單位業主上個月初已減咗價約10%，依家再將代理佣金加五成，到佔樓價1.5%。
東九二手商廈業主出招吸客個案
代理同劉Sir講，今年三月九龍東商廈買賣只有約20宗，按月少逾40%，雖然區內唔少商廈業主已減價賣，但買賣成交未見突出，相信上個月成交量只得10餘宗，按月跌幅仲大，差唔多近50%。
佢仲話，億京發展嘅九龍灣宏光道6號商廈樓花重建項目，有機會今年中近現樓賣，呎價要1萬元起，相比之下，區內主要新建商廈呎價約8,500至9,500元，相差不大，相信好難爭客；加埋新地（00016）等嘅觀塘海濱道181號商廈樓花重建項目，有可能今年下旬賣，估計發展商可能提供置業優惠吸客，令唔少區內二手商廈業主開始積極減價及罕有加佣促銷。
萬兆豐九個月成交期
依家觀塘皇廷廣場業主減價幅度約莫5至10%，個別中層單位業主為求盡快出貨，加佣至佔樓價1.5%，而業主上月初已經減價約10%，意向價調低至約1,500萬元，呎價約7,500元，出貨意欲好強。另有業主提供特長成交期吸炒家，區內萬兆豐中心中層單位，業主本年至今已累積減價近13%，依家意向價降至約884萬元，呎價約6,800元，仲可以傾長成交期，大約有九個月。
億京兩個月嗌低17%
早排九龍灣億京中心二手放盤單位，意向呎價閒閒地過1萬元，嚇怕唔少準買家，惟今時唔同往日，依家該物業一個中層單位業主將意向呎價減至約1,900萬元，呎價約9,500元，兩個月間累積減價差唔多17%。而一向買賣唔算多嘅區內南豐商業中心，有個高層單位業主睇淡後市，減價約12%放售，意向價約910萬元，呎價約7,000元，較今年三月初叫價，低4個百分點。
| 租／售 | 租 售 |  |
| 樓盤由squarefoot.com.hk提供 | ||
