投資SUN國度：逆向操作 Put建材Call保險

亢奮一日之後回復平淡是十分正常，始終MSCI增加比重不是一時三刻的事情。假如同人講港股會大升，直指23,000點，根本無人會再信。

市況淡靜搵藉口炒，四川地震成為焦點，自己毫無興趣跟風，反而小注掉轉頭做，Put建材股Call保險股。根本今次情況和汶川相比差距甚遠，而建材股經歷汶川後這五年，期間根本未有進步過，完全不明白市場為甚麼有如此反應。原本自己只是打算賭單邊，博建材股回落，不過後來考慮到市況太靜，又接近月尾，隨時有機會忽然突破，買保險股Call包炒向上，風險也不是太過犯本，便一併出擊。

這種一Call一Put策略的風險，是市況繼續膠着，無力突破，到時兩邊一齊跌到零，這個情況是有頗大機會出現。只是反正亂咁炒隨時輸更多，買一套期權組合至少可以睇到月尾，當作是志在參與，考考眼光，好過甚麼都不做。

如果自己近期不是比較消沉，上述的套裝是有潛質大注博一博，難得有機會認定市場是睇錯，縱使股價超買超賣幅度不外百分之幾，但以這些大股而言，已經算是不錯。而且買Call買Put的好處，是輸盡有個譜，其中一方企錯邊頂多輸到零，睇中一方卻可能贏幾倍，牌面上博得過。

落基本注志在參與

除了自己戰意低迷之外，香港市場深度差亦是問題，尤其是期權。由於今次是逆市行動，如果中途決定已經睇錯市想斬倉，輸差價都輸死。有前無後打死罷就式的賭法，在順風順水的日子無所謂，在現時環境當然不太想冒太大風險，落基本注已經算是畀面。