Agnes對於好友後藤健二被極端組織伊斯蘭國處決感到痛心。
陳美齡（Agnes）多年來積極宣揚和平與友愛，日前她在港接受訪問時，提到曾被回教極端組織伊斯蘭國（IS）處決的日本人質後藤健二 ：「我同後藤係好朋友，舊年4月我哋一齊去咗非洲做探訪，佢好好人，同成班義工都好熟，記得當日聽到佢被擄，我哋成班義工唔敢相信，本來佢好有機會返到嚟（獲釋），後尾返唔到，我成個月都瞓得差。」她透露後藤很愛錫家人，亦很關心三名女兒：「有次佢發訊息畀個女，佢等到最後一刻個女覆咗，佢先肯上機。（有指佢喺人質片段中，以眨眼發摩斯密碼叫人唔使救佢？）其實佢當日係去敍利亞救佢朋友（另一人質湯川遙菜），我諗去得都已經有心理準備。」她指戰爭很討厭，又指現在中東及非洲等地都很亂，原定本月會前往敍利亞探訪，但最終取消。
Agnes在相展中展出不少探訪第三世界國家兒童的照片，希望喚起社會對受苦兒童的關注。
另外，她昨日與母親彭端淑女士在港出席「全為愛 陳美齡博士與天地孩兒」相片展覽開幕活動，她希望透過將這二十年來去過的二十多個國家的探訪相片，來喚起大家關注世界各地正在受苦的天地兒童。提到家庭生活，她表示三名兒子和平、昇平和協平分別已28歲、25歲和18歲，各人亦已有拖拍：「娶新抱就梗係好啦！最緊要係抱孫，如果生咗小朋友，我養吖！（催婚？）唔夠膽催呀！怕催咗佢哋唔理我就慘喇！」
