楊千女華與兒子Torres認真好腳頭，羊年首次入馬場即拉頭馬！千女華一家三口昨日齊齊入馬場，為奶奶的愛駒「野孩子」打氣，結果成功贏得羊年首場賽事，贏得約43萬元獎金，Torres開心得豎起拇指讚No.1！
千嬅一家人與奶奶拉頭馬，千嬅趁機會教兒子近距離摸愛駒。
肉緊打氣
睇住愛駒透出，千嬅愈睇愈肉緊，Torres則在老竇丁子高懷中舉手打氣！
衝線攬賀
贏咗喇！千嬅與親友即攬作一團互相祝賀！
千嬅與兒子兵分兩路入場，免得他見記者時受驚。
丁子高笑言打破宿命，終可與母親（右）一家人入凱旋門！
馬場常客何傲芝（圖）與擔任主持的朱凱婷扮到靚一靚。
朱凱婷
昨日年初三賀歲賽馬日，楊千嬅、丈夫丁子高（Real）與囝囝丁進諾（Torres）一家人現身馬場，為奶奶名下愛駒、出戰羊年第一場賽事的「野孩子」打氣。據Real透露，因母親很喜歡千嬅的經典名曲《野孩子》，加上覺得這歌名很適合愛駒的個性，故取名為「野孩子」。Real兩母子率先到場，未幾千嬅拖着兒子現身，當看見有大批記者後，即把Torres交給同行的女子帶走後才企定定拍照並說：「囝囝入咗去，我趕住去湊仔，佢見到咁多記者喊驚咁。」
冇落注免搭沉船
平日忙於工作及照顧Torres的千嬅絕少到馬場，今次趁着賀歲賽抽空帶兒子入場支持奶奶，結果「野孩子」順利勝出，千嬅一家人齊齊「羊」威拉頭馬，成功捧走433,200元獎金，看來千嬅與Torres母子相當好腳頭！
賽後，Real受訪時被問到一家人拉頭馬，他亦笑言終於打破宿命：「今次係我第一次入場同媽咪拉頭馬，隻馬係媽咪同佢朋友嘅，已經贏過幾次。我好少入馬場，因為入親嚟都唔會贏，我媽咪頭先話我終於打破呢個宿命。（有冇落注？）我冇買，我由細到大買親次次都輸，費事搭沉船。（係咪好有信心先帶埋千嬅同囝囝嚟？）Torres好鍾意馬，賽馬日佢喺屋企都要開電視睇馬仔，買咗好多馬玩具畀佢。佢今日係第二次入馬場，跑緊時我嗌『1號』佢又一齊嗌，見跑第一佢就豎起拇指讚隻馬話No.1！（佢唔驚隻馬？）初時都以為佢會驚，拉頭馬時佢企喺隔籬都伸手去摸。我遲啲都會帶佢去探吓隻馬，畀佢餵吓。」
至於會否讓兒子學習策騎？Real說：「等佢大個啲先，五、六歲時如果佢想學都會畀佢學。」他又指Torres在場內十分搶手，人見人愛，(逗)了不少利是！很多不相識的Uncle與Auntie爭住跟Torres拍照及派利是，他還表示千嬅下午要到澳門出席花車巡遊活動。
師傅指點生三個
另外，Real又透露剛才在場內看見麥玲玲師傅時，問到自己會否有第二個小孩及會否生女：「玲玲師傅話我有嘅，不過第二個都係仔，第三個先會係女！生三個我接受到，但千嬅聽完就同師傅話：『唔好玩我啦！』，哈哈！」
吸金唔野小
楊千嬅奶奶黃淑貞為「野孩子」的馬主之一，現年5歲的「野孩子」隸屬容天鵬馬房，出賽九次獲得兩冠一亞一季，累積獎金達113萬元。今次賀歲賽頭場四班千二米賽事，「野孩子」由冠軍騎師潘頓策騎下大勝三個半馬位，贏得約43萬元獎金。
第一手消息請下載on.cc東網名人組
