陳琪與老公胡諾言撇低愛女到杜拜旅行，過二人世界。
藝人陳琪早前偕老公胡諾言到杜拜旅行過二人世界，Sweet爆的他倆更在清真寺「犯禁」拖手仔！不過「廿四孝媽咪」陳琪一上機便後悔，因太想念兩個心肝寶貝，更表示下不為例。
膽小的陳琪被胡諾言強行拉上駱駝。
胡諾言與陳琪彈起合照，真係睇相都覺得開心！
陳琪與老公胡諾言（胡仔）婚後未有正式度蜜月，早前終於撇低囡囡，暢遊杜拜十日，但夫婦倆未出發已對兩個寶貝女心掛掛，更揚言下不為例，陳琪說：「上飛機已經後悔，去到機場已經唔想玩，好掛住個女，好想返屋企。」
Fing甩手仔合照
他倆甫落機即傳短訊給愛女，陳琪慶幸可透過Web Cam(目及)實囡囡，又傳錄音短訊一解相思之苦：「我哋同個女講唔好玩，等佢冇咁傷心，後來都嬲咗我哋一日，因為睇相覺得好好玩，仲話下次唔帶埋佢去，我哋兩公婆都冇得去。（玩得唔投入？）大部分家長都係咁，尤其去小朋友玩嘅地方，特別掛住佢哋。」
不過，陳琪表示今次有老公安排行程，笑言「唔使用腦」很開心，又指杜拜甚少中國旅客，因此夫婦倆可以手拖手，更在清真寺「犯禁」：「我哋唔識回教禮儀，原來連拖手影相都唔得，啲工作人員見到好緊張，即刻上前制止，又叫我哋Delete啲相，我哋都好尊重對方禮教，結果喺清真寺離行離列咁合照，好好笑。」
玩吉普車驚炒
而從來未玩過刺激活動的陳琪，今趟為愛刺激的丈夫獻出多個「第一次」，除被胡仔強行拉上駱駝合照外，到埗首日更到沙漠玩吉普車：「同車有兩個外國人，女士就坐前排，老公就同個外國人坐後面，衝落沙丘時我幾驚翻車。反而大女好大膽，佢4歲就玩過山車，可以陪爸爸玩。」
影視組
