鄭希怡（Yumiko）在其時裝網站中以模特兒身份上陣賣潮裝，可是肚大如籮的她，實難繼續做「生招牌」，惟有另覓人選，近日她的模特兒終現身，正是和她有幾分相似的鍾浠文（Zelia），兩人穿上同款大褸時更如孖生姊妹般。

穿同款大褸的Yumiko（右）與Zelia恍如孖生姊妹。

Zelia一埋位擺甫士便做到Yumiko的要求。

Yumiko曾邀黃偉文為時裝網店宣傳。

鄭希怡去年投資七位數字做老闆娘，成立時裝網店買潮服，而衫網的賣點除擁有模特兒身材的她這位老闆娘做生招牌，以及教潮女一衫多着外，最吸引是Yumiko可能變身做速遞員親自送貨。

利是當酬勞

不過即將於4月生BB的她，因身材有變，加上不宜太操勞，早前另覓他人代做「人肉衣架」，在幾經物色下被她遇上有樣有身材的周柏豪前緋聞女友Zelia，日前Zelia已到Yumiko的製作室拍攝一系列新裝，Yumiko更穿上跟Zelia一樣的服飾，兩人合照時儼如一對Twins。

Yumiko接受電話訪問時說：「好開心搵到Zelia幫我做模特兒。（酬勞幾多？）佢好好，我畀咗封利是佢咋！（佢表現如何？）好專業，一埋位就做到我想要嘅嘢！（你哋有啲似樣喎？）少少啦！不過佢仲高過我。」問到生BB後會否再做模特兒？她說：「未知呀，生完都要湊B，睇外面反應再算啦！如果啲Fans鍾意我做番，或者我會再考慮嘅。」

考慮賣童裝

問到業務如何？她感恩地說：「一早回本啦！所以我會再投資多六位數字改善個網，或者加啲新嘢賣。（賣埋童裝？）搵我個B做Model，好喎，等我諗諗先。」