谷收視搵命博 秋生斥：不如叫明星跳樓

對於釋小龍的助手於跳水節目意外溺斃，黃秋生前晚在微博留言：「跳水節目終於出事，玩命節目，他們不想清楚的嗎？建議叫明星去跳樓，看誰命大，收視更佳。」他昨日受訪時說：「我無意干涉內地節目點製作，但貿貿然叫藝人跳水，係攞人命較飛！個節目有搵過我，我聽到嘅反應係『黐筋！』訓練兩個禮拜就上跳水台，田亮使受訓咁多年？咁高撞入水，隨時眼盲、面鎅開，不如鋪張氣墊，叫人由十樓起跳，十層十層逐級上，收視仲高！（替阿Sa擔心？）唔係話唔跳得，係安全措施一定要足，依家死咗人，證明做得唔足！唔係刺激好睇就做咁戇居o架？叫個台長落場吖！希望香港節目引以為鑑。」而早前杜汶澤到上海參與東方衞視遊戲節目《脈動夢立方》時因跣倒而腳脛紅腫，對於今次阿Sa為跳水節目傷舊患，他亦感同身受：「阿Sa有勇氣面對自己恐懼，挑戰自己，值得敬佩，但凡事應量力而為。」

此外，前晚約9時，秋生與女助手到大坑酒吧飲酒，有講有笑，期間兩度外出煲煙。