300方呎軍火庫 足夠武裝SWAT

【本報訊】只有三百平方呎的公屋單位，塞滿強力軍火，火力勁過一間警署槍房，亦足夠武裝一支特警組（SWAT TEAM），但低設防，更毫不忌諱掛滿全屋「任睇」。警方查封花足十二小時，將彈藥槍械用二十多個紙皮箱裝載、裝滿三車才運清。有探員驚嘆爆炸威力如靶場操炮，亦有專家指，所有彈藥萬一爆炸，會炸冧至少兩個單位，有資深槍會會員指，有個別人一味「發燒」，私藏軍火忘卻影響公眾安全，萬一出事會釀成慘重傷亡。

揭發軍火庫的單位，有一房一廳，屬二至三人單位，客廳右邊牆身，置有兩個五層高至天花的槍櫃，放滿多款不同長短槍械、迫擊炮彈等，右邊大櫃放有屋主收藏的魚竿。

登門拜訪即一眼睇晒

另外，睡房亦置有槍櫃及夾萬，內有大批子彈火藥，有探員質疑若登門拜訪即「一眼睇晒」，但不明為何無人報警。

深水埗助理指揮官（刑事）劉達強形容，男屋主為「軍火收集家」，當警方發現迫擊炮彈時：「覺得好大件事，好驚！」其後，證實該迫擊炮彈三十毫米口徑：「雖然無殺傷力，見到都幾恐怖。」至於子彈數量之多，劉直言：「數一日都數唔晒。」另外，肇事的點二二口徑來福槍，出事後還有子彈留在槍膛內。至於大批彈藥放在同一間民宅內，理工大學機械工程學系工程師盧覺強亦指，一旦爆炸可震爆窗，如在密室爆炸更可震塌牆。

有資深槍會會員指，本港大部分領有槍牌的射擊愛好者均十分守法，惟有部分人士則以為持有槍牌可以「無王管」，經常以搜集大火力槍械及子彈為榮，甚至拿回家改裝，忽略了安全，他們未必想犯法，但此舉卻對公眾造成極大危害。