Fundman睇市：中石油等回吐買貨

這個世界，永遠是債主緊張過債仔，希臘在削減開支談判上一直愛理不理，一拖再拖，急性子的德國總理默克爾已按捺不住，警告如果希臘政府唔能夠同歐盟委員會、IMF和歐央行達成協定，無論歐元區及國際社會，都唔會向希臘提供任何新財政援助。查實，對住希臘勞氣真係無用，遠的不提，去年八、九月幾次過渡貸款談判，幾乎係無次準時在死線前傾妥，不過由「歐豬」債息未有因為消息回升，看來歐洲債商心中有數，已經唔當希臘「玩嘢」係一回事。

要數失望，A股表現真係衰到加零一，中國乃全球大股市之中，表現最差市場之一，只係由五十二周低位反彈7.4%，維持着行三步退兩步，唔願升的走勢。尋日，滬綜指跌39點，報2,291點，始終無法穩穩陣陣企響2,300點樓上，也拖累港股個半月以來，第一次連跌兩日。

港股挾上機會仍高

有歐資行傳出，內地將公布的一月份新增貸款數字，只得7,000億至8,000億元人民幣，遠比分析員估計嘅1萬億人民幣少，A股盼資金由緊轉鬆，只怕係一廂情願。查實，講來講去都係錢作怪，美國央行驚死大家唔肯借錢唔肯使錢，聯儲局講到明一四年底前都唔加息，結果美股超買後再超買。反之，中國經濟問題複雜，一方面要壓通脹、防樓市炒風死灰復燃，仲要處理三年前四萬億基建大白象的「蘇州屎」，放水都只係透過停發央票玩低調。

近期夾在美國及中國兩個股市之間的香港投資者，都幾精神分裂，唔知可以跟邊個市場，但史提芬傾向相信，現階段出現大調整的機會仲係唔大，港股再挾上逼更多基金追貨的可能性較高。

下星期三，又到大摩指數（MSCI）季度檢討，近年愈來愈多指數基金出現，追住指數「照單執藥」，每次入選的新貴，爆炸力隨時比入藍籌有過之無不及。有賓架朋友秤過符合條件的潛力股，包括洛鉬（03993）、中國中冶（01618）及新世界中國（00917）。

回顧美國次按海嘯時，國際油價由140美元樓上跌到最低33美元，反觀去年的歐債危機，油價最差時只係回到76美元，已拒絕再跌，筆者解讀為○八年海嘯的大規模去槓桿化，商品基金冚倉活動近乎瘋狂，對比下，去年情況相對冷靜得多。近日，美國及歐洲石油消耗數字，都有高位回落迹象，但新興市場及金磚四國等需求不絕，何況珠玉在前，QE1及QE2對商品價格的刺激有目共睹，市場對QE3之預期，歐元變相QE推出LTRO，都令油價呈居高不下的情況。很難想像，在目前歐美經濟基數較低時，油價仍然企在95至100美元水平，一旦經濟曙光再現，油價可以升至甚麼水平？

中石油（00857）股價由十二月低位8.85元起步，到昨日11.6元，累升31%，往績市盈率回到大約12倍。美國總統奧巴馬提出對伊朗採取新一輪制裁，或者短期可以令中石油股價間接受惠，挑戰12元水平，未有貨者，筆者認為可以先待回吐出現，在11元附近，相當於一二年市盈率10.2倍左右入市，中線會看較具值博率。