Fundman睇市：中信行博反彈之選

港股真係運滯，A股升時美股跌，唔願跟升，好了，到美股開始炒QE3大升，那邊廂A股又開始高位回吐，搞到信心仲相當脆弱的基金經理，並未有十足信心入市買貨，前晚美股升逾200點，港股逢二進一，恒指升101點，收報22,003點，可是昨日即市一度升穿10日線22,072點，立即腳軟掉頭向下，明顯畀人感覺係，大市即使短期見咗低位，反彈力仲係極為薄弱。

港股開市前，投行賓架睇實蘋果公司在美股收市後公布嘅成績表，揣測美股尋晚可以再升幾多點。傳統智慧話，企業規模及盈利規模愈大，盈利增長幅度無法避免減慢，但睇到蘋果份成績表，不能不佩服教主Steve Jobs的能耐，自己病到五顏六色，但喺佢領導下，這隻市值2.73萬億港元、比全球最高市值銀行工行（01398）仲要大兩成二的科技股航空母艦，第三季賺73.1億美元，繼續錄得接近一倍的增長，實在匪夷所思。

以前諗都無諗過，會有電子消費品面世九個月之後，居然仲長期缺貨，買機好似去電器舖「乞機」一樣，要留名等電話配給。業績亦解開今年六月，蘋果公司無按以往慣例公布新一款iPhone之謎，皆因iPhone4依然太好賣，上季全球賣2,030萬隻，比大行預測的1,700萬足足多19.4%。

iPhone4熱賣瑞聲翻身

同科技股分析員傾開，原來今年幾個手機品牌，都因為蘋果iPhone5延期推出而失咗預算，令七至九月形成新機真空期，咁趨勢，就算產品近周期尾聲，iPhone4第三季唔難再賣800至900萬部。

港股之中，幫iPhone做微型揚聲器的瑞聲（02018），早輪就因為新機押後，加上另一大客NOKIA變咗科技界鐵達尼，結果股價由高位顯著調整，但以13.2倍預測市盈率，估值已近一年半低位，水尾的iPhone4好賣，加埋九月iPhone5登場，要炒番去20元樓上應該唔難，不妨留意。

最近想到底中國地方債務問題及不良貸款比率長期趨勢見底之外，有沒有其他影響內銀股前景的因素。美國GDP接近中國的三倍，儘管銀行乃百業之母，但強國也不代表銀行同樣強壯。美國三大銀行美銀、花旗及富國，市值合計只係3,580億美元，中國單是一家工行已2,900億美元，是美國銀行股被低估？抑或內地銀行相對經濟體規模太大？筆者相信這應該同內銀長線被睇淡有一定的關連。

不明朗因素已消除

講開內銀，最先攤大手板，好處是最快消除需要集資的不明朗因素，中信銀行（00998）供股權尋日最後交易，股價由4.41元低位出現技術反彈。

中信行及招行（03968）等規模較細的內地銀行，受人行提升存款準備金率去到歷史高位，以及銀監要求提升資本充足比率的影響，的確會比大型銀行大，支撐估值溢價的股東資金回報率會因此攤薄，但與雙位數字市盈率的招行比較，中信行一一年市盈率僅6.6倍，是目前最便宜的內銀股，甚至較三大行的6.8至8.2倍仲要低，要博反彈，筆者相信中信行會比較合適。