Fundman睇市：地產股背馳情況明顯

渾水基金今次終於有競爭對手，穆迪搞個紅旗指標，令到尋日幾隻被插旗嘅股票急瀉，重災區係插住12支紅旗的西部水泥（02233），跌14%，一支旗跌1%會唔會成為短期淡友不成文指引？好難講，由穆迪與渾水的研究報告操作方式，大抵感受到今時今日，對沖基金逐漸取替傳統long only基金，大市玩法同以往唔同。芬佬心諗，既然炒唔上，炒落都無妨，傳統證券分析漸漸變成對沖基金賭升賭跌嘅「打手」，幫手唱淡齊齊搵錢。對於同史提芬一樣喜歡買入長期持有的老一派手法的投資者來說，或者未嘗唔係好事，等班大孖沙互相廝殺，加速股市調整，總之預留彈藥，隨時入市執跳樓貨。

iBond招股，美其名畀普羅大眾對抗通脹，但如果最後每人1手，叻到極一年收幾百蚊利息（利息與通脹掛鈎，每半年派息一次），點對抗通脹真係天曉得。近年特區政府施政問題多多，不妨想想，既然無舉債需要，特區政府發iBond變相是每年拎幾億銀出嚟派街坊，到底幫到甚麼階層？如果政府每年攞5億出去派，夠畀全港領生果金長者每月加餸600大元，咁做肯定多啲社會認同，至少長者們都會講句多謝。

基金股暫宜迴避

講番股事，外圍內部都充斥壞消息，港股跑在歐美股市之先，大跌684點，收21,663點，當恐懼戰勝理智，跌市可以唔講道理，股民短期最好避開近半年跌幅較少的基金股，怕佢成為基金下一輪向下炒的搵食對象。

有一段時間無提地產股，睇番恒生地產分類指數，自去年十一月見33,816點的金融海嘯後高位之後，有一浪低於一浪之勢，目前在27,475點，比高峰回落近一成九。相當有趣的是，近期新地（00016）的大角咀新盤賣到滿堂紅，中原城市指數亦再升穿100點水平，創回歸後新高，地產股同樓價背馳的情況日益明顯。

唱淡者提出九七年前，地產股習慣比實際樓市跑先八至十個月，如果去年十一月地產指數見頂，照推斷今年七至九月份，樓價會難逃一跌？

奇怪是地產分類指數，在九七年及○七年樓市大升周期，每每能在高峰突破二倍市帳率水平，但去年去到高位1.45倍便回落，依家更只係得一倍左右，到底係股民睇地產股睇得太悲？抑或樓市炒家睇得樓市太好？抑或是，樓市多了一批內地豪客支持，扭曲了供求曲線？

樓市怪象難解釋

要解答這堆問題唔易，尋日瑞銀出咗份地產股報告，調高地產股一一年盈利預測8%，卻調低一二年資產淨值預測13%，目標價更降低30%之多，一連串調整下，到底份報告想唱好定唱淡，筆者一頭霧水。

純以資金調配考慮，龍頭新地一一年預期股息回報2.6厘，稍低於3至3.5厘的買樓收租回報，如果睇好樓市，毫無疑問趁美國加息無望，趁平息以財務槓桿借錢買樓，博樓價升兼賺租金回報最為理想。如果預期樓市會在高位橫行發展，那資產折讓的地產股應有修正的條件，回到歷史平均1.1至1.2倍市帳率區間。當然如果睇樓市要插水，最好兩樣都咪掂。