Fundman睇市：數碼通收入未見頂

中國六月份通脹升至6.4%，三分之二升幅來自食品價格急升，單係豬肉價格就比去年升57%。中國人飲食文化好得意，由平民百姓朝早一盅兩件，或者到達官貴人晚膳名菜火瞳翅，都同豬肉拉上關係。為荷包着想，中國人或者都係時候食得健康啲，菜蔬價格已經回落幾個月，多菜少肉真係可以慳到荷包。

6.4%會唔會係呢次通脹周期的高峰，暫時唔容易估，始終加存款準備金率同加息，對壓抑糧食價格作用唔大，中央要點樣協調供應先至係關鍵。

昨日港股表現充分反映大孖沙共識，就係人行唔會咁快再開水喉，加埋地方債務問題，內銀股被隊到開巷。恒指全日跌379點，報22,347點，淡友借幾隻重磅內銀股做起淡上嚟如取如攜。港股今浪由21,508起步升至22,835點見頂，五成回吐支持在22,171點，一旦失守，意味着今浪只係上落市一次小火花，唔係好友所指一個全新牛市來臨咁鬼樂觀。

業績期小心踩地雷

踏入七月，又到唔少上市公司中期業績前一個月的冷靜期（pre-blackout），最後的營運指引，以至盈喜、盈警都係呢個時候曝光，雨潤（01068）、百麗（01880）及中國建築（03311）剛公布營運數字都唔錯；反之，鞍鋼（00347）、霸王（01338）、中國動向（03818）就認真麻麻，筆者大致感覺係，可能市況實在麻麻，盈喜或者營運數據超出預期，股價未必升好多，但稍有差池，對股價的破壞力就相當大，股民揀股票最緊要睇清楚幾時出業績，自己計計時間，無謂踩地雷。

智能手機普及，功能愈來愈強勁，今時今日唔少人一機在手，漸漸成為不可或缺一部分。香港手機普及率全國之冠，唔少人用緊固定月費無限數據計劃，但不可不知，同蘋果公司結盟，開賣iPhone4無幾耐的北美電訊商Verizon，上星期宣布終止固定收費任用計劃，多用多付收費模式的趨勢，會唔會殺嚟香港？

史提芬早幾個月已聽到幾間電訊商有此打算，只係等今年底明年初升級第四代系統LTE時才一併落實，即時令人聯想到，本地電訊公司的每月每戶收費，可能會因此繼續改善。

市面2隻流動電話股，數碼通（00315）及和電香港（00215）各有優點。數碼通近一年營運表現可謂脫胎換骨，公司慷慨的百分百派息政策，甚得基金經理歡心。

最新綜合預測一一及一二年純利6.77億及8.28億元，相當於1.31倍及22.3%增長，股息回報5.3厘及6.2厘，最近股價調整，跌至11元樓下支持力相當唔錯，憧憬智能電話再無定額任食的buffet收費形式，買少少幫補吓未來電話費加幅都唔錯。

和電香港同樣吸引

至於和電，去年其盈利派息令唔少大行失望，股價由二月的3元樓上跌至早前最低的2.13元，但因為固定投資及折舊高峰期應該在今、明兩年出現，而盈利派息比率六成四，仲有提升空間，綜合大行估今明兩年每股派息有12.1仙及14.1仙，息率都有4.8及5.6厘，作為收息股都算吸引，股價下跌風險應該唔大，亦值得諗諗。