Fundman睇市：德永佳價值未反映

美股走勢認真反高潮，上星期四，美國薪資服務提供商自動數據處理公司（ADP），公布六月私營企業新增職位15.7萬個，係分析員預期7萬的一倍有多，ADP數據之後，華爾街對上周五官方的就業數據充滿幻想，結果六月非農就業新增數字遠遜預期，得1.8萬個，只及市場預測增加10.5萬的六分之一，失業率去到9.2%。

受數據影響，美股由中段大跌152點，到埋單收市只跌62點，報12,657點，一來係股神巴菲特打賭，睇唔到美國經濟會出現雙底衰退，仲預測失業率未來一段日子會慢慢改善，去番6%水平。係咪有啲股神睇到而我哋睇唔到嘅嘢？筆者唔知，但客觀形勢話畀大家知，明年美國踏入大選年，政府點都要做少少工夫，等經濟唔太難睇，好爭取選票，所以打爛飯碗的人愈多，聯儲局要再出QE的機會就愈大，以上周五股市反應所見，未來兩個月隨時出現數據愈差、炒家愈高興的局面。

中國通脹六月見6.4%，創三年新高，豬肉價格按年升五成七，單係食物價格已經佔通脹來源三分之二。大部分分析員指中國通脹會在六月見頂，即使唔使佢哋講，史提芬亦估計數字上物價再升的幅度，未來一段時間會減慢，主要係因為去年下半年中國物價基數比上半年高一截，假設按月物價唔再上漲，未來幾個月，以年率計算的CPI會由六月份6.4%，逐漸回落，去到七至十二月的6%、5.4%、4.8%、4%、3%及2.4%。

緊縮政策短期難改

老實講，股市會唔會因為通脹見頂開始掉轉頭炒，史提芬確實無四、五月時咁樂觀，一來，即使物價穩定，人行好大機會仍繼續以緊縮貨幣政策控制通脹預期一段時間，免得一輪壓通脹行動功虧一簣。其次是中資股弱勢的原因，由民企洗倉潮，蔓延到規模更大、問題更複雜的地方債務違約風險上，淡馬錫早前大手減持建行（00939）及中行（03988），預期八月輪到美銀出招，策略股東的陸續退場，係因為資金需求抑或睇淡內銀不良貸款見底回升，值得大家認真地好好想一想，今次未必係通脹見頂，股市見底咁簡單。

近幾個月，本地零售股表現一枝獨秀，唔少愛股由去年極度抵買變得開始不再便宜，好似I.T（00999）、六福（00590）等，唯一仍然比較落後的，應該是德永佳（00321）。

憧憬分拆零售業務

筆者認為德永佳是紡織股價錢，零售股享受，基本上旗下時裝連鎖店的應有估值，完全無反映在股價身上。一一年預期市盈率只得9.9倍，去年純利11.3億元，按年升12.5%；營業額118.6億元，紡織及旗下零售品牌Baleno差不多各佔一半，去年營業額分別錄得7.8%及17%增長。管理層提過把零售業務分拆上市，可惜一直只聞樓梯響。去年Baleno表現唔錯，如果可以把握本地零售股受歡迎的大趨勢，應該可以爭取唔錯價錢上市，使德永佳母憑子貴。姑勿論分拆是否成事，以接近5.3厘股息回報，紡織業務今年毛利好大機會低位回升，多一重盈利增長動力，德永佳在10元樓下，中線依然具相當吸引力。