Fundman睇市：亞洲水泥有力再升

人行前日傍晚宣布加息四分之一厘，美銀美林估計今年內地利率經已到位，唔少老友前晚聽到消息，磨拳擦掌諗住人行加埋今次，短期再無緊縮政策跟尾，港股應該會有較為「激盪」反應，殊不知結果相當反高潮。

尋日恒指高開低收，指數埋單升得12點，報22,530點，周一長假期復市勁升超過300點後，大市已經一連四日高開低收，話基金在半年結之後轉沽為買？睇落似逢高派貨多啲。

唔信？睇番港匯由六月中7.82水平樓上，回升至近日的7.78附近已見行人止步，可見資金流入的情況有放緩迹象。建行（00939）及中行（03988）尋日高位沿途見大行沽盤不絕，由港交所（00388）的沽空名單所見，農行（01288）全日沽空6,129萬股，相當於成交量的31%；太保（02601）595萬股沽空，佔成交34.6%；國壽（02628）475萬股，佔21.6%。可見內銀、內保在大孖沙眼裏仲係淡過水，相信要到八月美銀手上建行禁售期完結，確認批股前後，屆時大市出現轉折點的機會才會較大。

李寧捱沽連累安踏

三年前北京奧運，體操王子李寧點聖火一幕，壯麗場面今日仲歷歷在目，不過因為咁而買咗李寧（02331）股票嘅，就真係喊都無謂，皆因三年後帳面仲要輸緊三分之一。

公司不利消息接二連三，五月高層地震之後，剛完結的第四季訂貨會，的成績的確幾驚嚇，估計上半年溢利率，會由去年同期的17.6%跌至8%，純利率由12.9%跌到6至7%。

執筆時未知分析員會面結果，但從大行預測數字，原先估今年營業額升八成七，如果訂貨額增長真係得5%，確係同預測相差十萬八千里遠，加埋純利率折半，史提芬粗略計，全年業績可能得3.3億至3.6億元（人民幣．下同），僅及大行所估的四成，難怪中期業績冷靜期（blackout）前夕的安踏（02020），全日成交四成四來自沽空盤，真係殃及池魚。

運動股唔得，另一邊廂水泥股繼續強勢，亞洲水泥（00743）發盈喜，指四川及湖北新廠房投產，加上水泥價格持續高企，帶動上半年業績有3.5倍增長，股價升一成。當然，去年上半年水泥市場仲未大熱，溢利基數較低，亞泥僅賺1.4億元，故上半年盈喜幅度亦零舍醒神。

中期業績食胡之時

中央加快保障房建設，筆者早前已提過，首季是水泥傳統淡季，價格反常地居高不下，而第二季及第三季展望，都未有掉頭回軟迹象，近期大行的報告，業績預測幾乎是改完又改，不斷向上修正。

坊間預測亞泥今年業績翻一番，賺10.21億元，估值8.8倍，以一間中型規模的水泥公司，產業又快將到周期的高峰，筆者認為去到十至十二倍估值都唔出奇，現價7.03元（港元．下同），最樂觀可見9.58元，揸咗貨嘅，不妨等八月上旬中期業績曝光時，趁好消息套利。

另外一提，另一隻業績大翻身的台泥（01136），如無意外，將會於八月底出成績表，要出盈喜的話，應該會喺未來兩星期，股價與四月高位5.23元仍有距離，炒家們不妨留意。