鋒芝鬥快返港捱眼瞓趕工

不見不見還須見，謝霆鋒與張栢芝捉迷藏足足兩個月，今日終要決戰陽明山莊作最後攤牌！為爭取時間搵仔及講數，霆鋒不惜捱眼瞓拍通宵，而栢芝亦帶病趕戲，務求趕及乘早機返港！

鋒芝婚變進入最後直路，「闊別」兩個月的霆鋒與栢芝，今天終要在陽明山莊碰面，解決這場世紀大龍鳳！雖然鋒芝分別於吉隆坡及大連趕戲，但不約而同捱眼瞓趕返港。同樣與時間競賽，但二人目的不同，霆鋒急於見兩個寶貝仔，而栢芝則趕時間與霆鋒講數！

連日來帶病拍攝新片《河東獅吼2》的栢芝，為趕於今日返港可謂吃盡苦頭，前晚只睡了3小時的她，昨晨連踩16小時直至晚上，以盡早乘飛機離開，由於酒店到機場需時兩個半小時，她漏夜執定行李，盡快梳洗趕往機場。

片場打呵欠

而霆鋒亦不遑多讓，為趕及《逆戰》宣傳片煞科，連日來日夜顛倒開工，在3天內睡眠不足4小時，由昨晨10時起一直拍通頂，至今晨上機後才能在短短機程中休息，劇組人員及身邊人知道他時間緊迫亦不敢打擾，讓他專心開工。雖然霆鋒極心急見寶貝仔Lucas及Quintus，但依然十分專業，抵港後先為手錶廣告試身，才仆往陽明山莊搵仔。

栢芝昨日為《河》片開工時，雖然感冒未清，仍不時與工作人員談笑，但畢竟有病在身，期間她難掩眼瞓打呵欠。工作人員指栢芝的戲份要拍到昨晚11時，而投資《河》片的新亞洲娛樂公司總裁余毓興，則大讚栢芝敬業樂業：「佢唔舒服，但都堅持7點起身，10點開工，直踩到夜晚。佢埋位時狀態好好，因為唔使NG，令馬偉豪導演好開心，佢亦冇唔開心表現。」問到栢芝何時飛返港，他說：「佢同我講一早走，我仲安排車畀佢，當務之急係解決家事！」據知，栢芝返港後會先睇醫生，再返陽明山莊。此外，昨晚傳出有內地記者於晚上9時許在寧波機場拍得栢芝乘內陸機離開，但至截稿前未獲證實。

Mani嘆多人抽水

至於霆鋒的經理人霍汶希（Mani），則拒絕回應與霆鋒媽咪狄波拉夾埋助霆鋒爭仔的傳聞：「唔係事實唔回應，呢排好多人抽水，希望件事盡快完！」問到霆鋒是否有足夠時間處理家事，她說：「佢有啲時間休息，跟住就要拍第二套戲，中間又有廣告，希望佢可以休息吓！」問到若栢芝願意共同撫養一對兒子，霆鋒意下如何？Mani認為霆鋒夠成熟處理問題，身為同事不便回應，並強調不知道霆鋒的意願。此外，昨日有報道指栢芝逼霆鋒賣舂坎角獨立屋，但據知並無此事，霆鋒亦沒有放盤念頭。