Fundman睇市：領匯穩定收息佳選

近幾日的經濟新聞，全部清一色「淡淡哋」，穆迪將希臘主權債務評級降至Caa1垃圾級別，前景轉到負面，理由係穆迪估計使慣歎慣的希臘官民，好有可能唔會應承大規模債務重組。前晚，希臘五年期國債的違約掉期（CDS）升至1,460點，歐債危機沒完沒了。

美國人力資源機構ADP調查，美國五月私人機構新增職位得3.8萬個，遠低於四月份的17.7萬及市場估計的17.5萬，係去年九月以來最低，今晚勞工部公布官方的就業數據，新增非農業就業職位目前預估值為17萬，睇完ADP份報告，恐怕再樂觀的大行都要接受現實，改番今晚份預測。

拖累道指前晚大跌279點，50日線（12,456點）得而復失的元兇，主要係美國採購供應協會的製造業指數（ISM），由四月的60.4跌到五月的53.5，數字係二十個月以來最低，按月跌幅更係一九八四年以來最大，新增定單數字跌到二十二個月最低，瑞銀報告話即使中國上月PMI無想像中咁差，但加上美國跳崖式插水的ISM，環球經濟放緩的陰霾短期唔易消除。

踏入六月，QE2快將正式玩完，美國就業市場同製造業景氣好一排又衰過，睇嚟市場好快會畀壓力伯南克再出QE3，難怪美匯指數去到76，捱唔到幾日又再碌番落嚟。

六月港股難寄望

外圍弱過藥煲，港股尋日跌372點報23,253點，周二急升的500點，大部分化為烏有，沽空額72.5億，佔大市成交比例由前日的7.3%升至11.3%，大跌市沽空有增無減，並非好兆頭。

道氏理論講過，牛市其中一個特色係升市長跌市短暫，每次調整都是大戶入市時機，相反，熊市跌市時間長反彈時間短，雖然今日仍然好難定斷，今日到底係牛市、熊市抑或橫行悶市？可是港股由四月初，用足足三十個交易日由24,468點跌到22,519點，共1,949點，再以短短五日時間完成1,188點反彈（十分接近跌浪的0.618），熊市味道濃到極，相信無幾多股民咁好彩在轉角市前後撈到底，大戶透過漫長式分段派貨，見跌唔落挾高又再嚟過，睇怕港股今次未必要去到日本地震後低位22,123點咁極端，但由承接力極其疲弱所見，擔心六月大市都叻唔到去邊。

領匯（00823）去年成績表唔錯，可供分派收入24.58億元，升15%，末期分派0.5759元，連同中期，每基金單位分派由前年的0.9737元升至1.1045元。期內旗下投資物業租用率由90.6%升至91.5%，整體每月平均租金升7.2%，使總收益及物業收入淨額分別升7.3%及9.5%，至53.5億元及36.4億元，經營開支升幅維持低水平，升2.8%至17.1億元，是分派收益上升的主要原動力。期內，投資物業重估收益128.1億，基金資產淨值由411.4億升至549.7億，相當於每股由18.68元升至24.63元，以昨日收報26.4元計，股價較資產淨值溢價7.1%。

預期回報4.53厘

或者有人會擔心最低工資的實施，對專攻中檔次商場的領匯影響較大，而隨着商場翻新工作進行一段日子，租金基數擴大，可供分派部分增幅會由雙位數跌回去7至9%，但以4.53厘預期回報，筆者深信領匯依然是一眾好息之徒及退休人士尋覓固定收入的佳選。以過去四年歷史股息回報率介乎3.8至6厘推算，未來一年股價極有可能在19.9至31.5元內上落，不妨伺機低位收集。