「Miss港姐」劉思希索晒脫娘大熱

15位入圍港姐昨日首度會見傳媒，上演一幕「醜女大翻身」！面試時似Miss多過似Miss Hong Kong的劉思希索晒，而「D Cup GiGi」許亦妮卻愈執愈大鑊！實行立即變靚又得，立即變醜都得，得咗！

經過兩輪面試及會見評判後，《2011年度香港小姐競選》終選出15位佳麗進入決賽，眾佳麗經大會「翻新」後昨日首度會見傳媒。一直有指港姐質素每況愈下，但大會依然對佳麗信心十足，連外形最具爭議性的K 「Miss港姐」劉思希（Lisa）亦突然變索，令人嘖嘖稱奇！

15位候選佳麗昨日清一色穿上Tube Dress示人，士別兩日，Lisa絕對令人眼前一亮！她在第二輪面試中將發黃底衫當面衫着，還戴上粗框老花鏡，驟眼看來似Miss多過港姐，但經大會「人工改造」後，她即時變靚，加上有選美經驗，行Catwalk時信心十足，頓由世紀大冷變成超級熱門，認真犀利！

「Wild黃聖依」動蕩胸

至於O 「Wild黃聖依」梁蔚翎也是焦點之一，雖然她的「阿凡達鼻」歷歷在目，現場亦見有少許歪嘴，但驕人D Cup巨胸的確驚人，在15位佳麗中，只得她可做出搖搖欲墜的澎湃效果，堪稱今屆港姐的「乳神」！

而賽前被公認為靚女的C 「D Cup GiGi」許亦妮卻愈執愈平凡，來自倫敦的她雖然貌似梁詠琪，但昨日的面容卻暗淡無光，除舉手投足沒精打采外，其D Cup上圍亦突然縮水，可謂判若兩人！至於E「國產周麗淇」朱晨麗雖夠索，但鄉音未改，看來已來港7年的她要好好在兩個月內學好廣東話。

「國產周麗淇」否認食煙

對於突然變靚，Lisa說：「我唔係好識化妝同Set頭，所以要把握機會學好！」而波濤洶湧的梁蔚翎則大讚其他佳麗身材好，可謂「世界女」一名，她說：「身材好唔係特別優點，只係我個人特質。」至於許亦妮則承認與Janice Man（JM）稔熟，但否認爛蒲及喜歡界有錢仔：「我同JM 14歲就識，參選佢都好支持我！」而朱晨麗則表示開心被捧成熱門，但對於食煙及好杯中物的傳聞，她堅決否認：「我都唔食煙，飲酒只係飲少少，豪飲嗰張相只係擺甫士！」

至於大會監製何小慧坦言，曾考慮邀謝霆鋒做港姐評判，但詳情要問陳志雲，而外景則已落實到台灣作環島遊，決賽將於8月7日舉行。