Fundman睇市：越房穩陣收息之選

標普將美國主權評級展望降至負面，這美國評級機構，真敢在太歲頭上動土！平心而論，美債評級是高是低，由屢創新低的美匯指數，可見市場共識。標普將全人類都見到之事實，高調地講一次，無非為挽回近年屢跌不止的公信力，好重新立足於道德高地上。

有朝一日，假如美債無咗三個A評級會點？由美元現時雄霸全球儲備貨幣之地位，可以想像，一旦被降級對金融市場的災難性衝擊，絕對勁過福島加切爾諾貝爾再爆炸一次，可見成件事根本只係擺姿態，選擇在此時此刻出招，陰謀論去想，同市場已預示六月底後，聯儲局唔會有QE3不無關係，標普應該係希望在美國退市風險上升前，幹點事省靚招牌。

係就係心理大於實際，但希臘可能要債務重組，歐債危機了無止境，中國GDP同通脹都比預期高，大有條件繼續緊縮政策，以壓抑通脹。全個世界無乜消息吸引基金經理放心入市，24,500點關口前升勢失速的港股，終於出現像樣的調整，昨日跌309點，報23,520點，現貨成交縮到唔夠700億元。純以走勢預測，後市下試23,000至23,300點的機會愈來愈大。

匯賢房託估值保守

由長實（00001）分拆的匯賢房託（87001），市後消息話超購1.3倍，唔算太踴躍，無他嘅，買REITs唔同炒新股，唔會一開升兩三成，考慮即時回報，應該唔會太多人願意畀1.8厘息證券行賺走去借孖展認購。不過史提芬本身就相當有興趣，原因一來可享人仔升值潛力，而匯賢近半租戶未來兩年續租，以市價應該有頗可觀升幅。

另外，暫時未有借貸，換句話說，未來好有條件以融資擴大投資組合，有位內房分析員朋友計過，話招股書上物業估值頗保守，計落制得過咁話。可是筆者最後無入表，皆因賓架行要先將港元全數轉換人民幣，就因匯率相當麻麻，還是決定等掛牌至算，希望未來這類以人民幣集資證券普及，賓架行有更好安排。

想收息又怕煩，查實可諗諗已上市的越秀房產（00405），兩者資產性質接近，越房主要持有廣州的商業及零售物業，以港元買賣，雖然大行的預測已包括人民幣升值因素在內，但預期息率逾6厘，若純粹收息，是唔錯的選擇。

物業集中廣州旺區

越房在廣州的物業投資全部位於天河及越秀區，包括白馬大廈、財富廣場、城建大廈、維多利廣場以及越秀新都會大廈，出租面積21.1萬平方米。截至去年十二月底止，租金收入4.85億元（人民幣．下同），升3.3%，收入淨額微升1%至3.79億元，每個基金單位資產淨值3.73元，可分派收入則維持前年的2.2億元，以港元計，則為2.57億或者每單位0.241港元。

去年旗下五個項目出租率介乎98至100%，遠勝廣州同業平均的87%。或許，越房的缺點是收入改善空間，不能由出租率着手，要睇租金增長，而展望廣州未來五年寫字樓供應充裕，有可能限制租金增幅。但還是那一句，如果想賭資產增值，越房未必是閣下杯茶，但就相當適合一些想安安穩穩收6至7厘生活費的投資者。