自日本發生地震及爆出核輻射問題後，「寫真女王」周秀娜（Chrissie）於日本的工作即叫停，但於地震前她為內衣品牌Embuche拍的第二季內衣硬照最近推出，更取代33D日本潮模藤井莉娜（Lena），升呢擔正今季刊冊的封面。
今次是Chrissie第二次擔任該內衣品牌代言人，上季她孖住Lena拍硬照，只能擔當「配角」做內頁模特兒；今年她得到品牌寵愛，冧莊拍攝，更升呢做主角拍封面，相反Lena已被Out出局，造就Chrissie成為品牌今季唯一的模特兒。
貪靚「絕食」見暈
新一輯內衣硬照，Chrissie先後換上16套不同性感內衣上陣，戴齊蔭假髮走娃娃可愛路線冧日本宅男，她扭身、瞓低又嘟嘴擺出多個誘人甫士，谷行32D逼爆上圍，可愛之餘不失性感，惹火程度爆燈！
Chrissie透露今次酬勞高達七位數港元，但因行程緊迫要於一日內完成拍攝，她自爆十多小時期間不敢進食︰「因為要着內衣，我怕肥影得唔靚，所以十幾個鐘冇食嘢，只係不斷飲咖啡頂肚，拍嗰時真係有啲暈暈哋！」她對當中的娃娃造型最為喜歡。由於要以不同場景配合多個造型，她大讚當地攝影師及工作人員非常專業︰「攝影師影得好快，每個景都係即場搭出嚟，佢哋真係好犀利！」
此外，問Chrissie何時再赴日本工作，她直言不擔心安全及輻射問題，若有工作便會過去︰「其實如果檔期就到都會過去，自己OK嘅，唔太擔心日本安全問題。」其經理人公司表示她的檔期已排到今年10月，現與日本公司保持聯絡，一直有洽談拍時裝雜誌的工作。
藤井莉娜（Lena）
年 齡：26歲
三 圍：33D、22、34
威水史：日本當紅模特兒，潮流雜誌《ViVi》及《Sweet》的御用模特兒，已加盟日本環球唱片攻樂壇。
周秀娜（Chrissie）
年 齡：25歲
三 圍：32D、22、32
威水史：09年推出刷牙噴血甫士寫真彈起，繼而推出人形攬枕、3D「洞房」DVD等成為宅男女王；近年轉戰影壇，片約不斷。
