金牌AE：北控水務吼位上車

周一推介隻永保林業（00723）呢兩日跟隨大市下滑，尋日收0.53元，較推介時跌3仙，但成交就好墟冚，可見市場有大盤趁機吸納。

賺錢之神邱永漢帶領一班日本投資者到港了解永保業務後，就給予高度評價，指出永保若能按既定發展方針營運，絕對有可能成為另一隻十倍回報股，邱氏過往推介嘅重點股升幅都以倍計，信佢眼光，不妨買番多少。

同獲賺錢之神睇好

今日推介嘅北控水務（00371）又係邱氏睇好嘅股份之一，佢認為內地面臨缺水問題，中央全力推行大規模水利建設，加上注資概念濃厚，未來發展深具增長潛力，值得長線持有。

北控水務主要從事污水處理同供水業務，去年盈利大增1.7倍至5.12億元，每股獲利12.99仙，現價2.42元，市盈率18.6倍，以其強勁增長而言，仍屬偏低水平。

北控水務最近股價由3元水平反覆回落，跌至2.4元已見強力支持，不妨吼位上車，目標價3元，止蝕價2.2元。

北控水務（00371）

目標價：3.0元 止蝕價：2.2元