Fundman睇市：蒙牛藉購併成就霸業

特區政府向磚頭炒家徵收懲罰性印花稅，港股仲頂得住，但尋日南北韓互相開火，整個亞洲股市都受到影響，港股終於頂唔順，急跌627點，收報22,896點，跌番去十月初低位，亦係接近兩個半月以來，第一次10日線跌穿50日線，技術走勢完全轉壞。

如果問兩單消息，對香港經濟長遠邊個影響大啲，毫無疑問筆者認為打壓樓市措施較大，但股市就係咁，受企業盈利影響外，其實有不少時間都係畀投資者情緒牽着鼻子走。

尋日，金價一度搶到每安士1,370美元，美匯指數即市也見過79.11高位，但去到歐洲時段，市場已經穩定落嚟，南韓總統克制的講話，相信都係想大事化小，小事化無。投資者想好似以前咁，趁南北韓局勢緊張沽股票，掃黃金、掃美金，已經行唔通，始終今時今日的中國，既有牙力做說客，亦唔想見自己後花園出事，點都唔會對南北韓坐視不理。

因為唔能夠採用主動沽盤（簡言之是只能排沽），理論上大跌市要沽空唔易，可是尋日留意到沽空金額有明顯增加，達61.2億元，比前日的45.1億元升咗三成六。而五隻沽空金額最多股票，依次係滙控（00005）、A50（02823）、平保（02318）、建行（00939）及中行（03988），兩隻內銀股供股在即，可以解釋到大孖沙點解沽得咁狠。平保上榜反而有點意外，始終內地進入加息周期，對平保最有利。再睇十一月至今，平保仲有7%進帳，表現優於大市，也跑贏內銀股一條街，看來基金開始打out-performer（跑贏大市股）主意，照咁睇，弱咗一排嘅內銀股，可能跌勢已經差唔多。

內地乳業重畫版圖

自從三聚氰胺事件發生後，內地乳業出現了翻天覆地的改變，期間的大規模回收產品、重建消費者信心、推廣品牌全部都係錢，財政實力差啲都頂唔住，這亦說明點解近一年間澳優（01717）、環球乳業（01007）及雅士利（01230）等奶粉股排住隊上市要錢。

新市場形勢，其實對大型乳業股有利，可以趁平搵購併對象，加速行業整合，達致汰弱留強。內地三大乳業巨頭之一的蒙牛乳業（02319），宣布以4.692億元人民幣，收購石家莊君樂寶乳品有限公司51%股權，成為最大股東，君樂寶是華北酸奶一哥，藉今次購併，蒙牛在酸奶市場的份額會直接升至三成以上。

對於市值377億港元的蒙牛，收購只及本身「晒士」1.5%的君樂寶，即時對盈利的影響應該有限。不過，尋日花旗有份報告，就道出收購的幾個好處。首先是君樂寶本身每日使用500至600噸原乳，相當於蒙牛的6至7%，未來可藉聯合採購取得更佳議價條件，唔使互雙搶原材料，讓乳農坐地起價。此外，廣告推廣開支可省下一筆之餘，長遠對擴闊產品種類亦有利。

收購出價未算太高

花旗指君樂寶○九年純利大約1,700萬元人民幣，相當於蒙牛的1.5%，而收購價則相當等於29倍市盈率，睇落出價都幾高。不過，花旗補充指，假設君樂寶在蒙牛管理下，效益提升到同等水平，即約5至6%純利率，屆時收購價將可降至14倍左右，咁聽落又唔算貴。

還記得十年前，內地啤酒行業整合，青啤（00168）同樣四處購併效益欠佳的中小型同業，奠定之後的黃金增長期，蒙牛今日會否照辦煮碗，趁競爭白熱化執平貨擴大市場？這可能看來未可抹煞。