金牌AE：哈動 吼10元水平上車

港股又現急挫，尋日恒指再跌627點，收報22,896點，連50日線都失守，下一級話唔定會跌至22,000點水平，買貨莫心急，仍以低吸優質股為上策。

哈爾濱動力（01133）近年大力發展核電同風電業務，係國策新能源嘅重點發展項目，亦係基金愛股，近期股價由高位連日下跌，尋日收10.52元，跌0.18元，較前周高位12.4元累計跌逾15%，可吼低於10元水平上車，初步上升目標13元。

哈動係內地規模最大嘅發電設備製造商之一，過去以產銷火電同水電嘅設備為主，但隨着國家大力推動潔淨能源，集團近年積極發展核電業務，同時亦進軍風電設備業務。

今年上半年，哈動營業額145.3億元（人民幣．下同），上升13.1%，盈利4.46億元，上升1.1倍，每股獲利32.44仙，期內未完成合約定單達980億元，足夠未來三年發展之用，同時亦取得約150億元嘅核電設備定單，預期可於明年帶來收益。

哈動現價預期市盈率十六倍，市帳率1.47倍，相對東方電氣（01072）嘅預期市盈率二十九倍，同市帳率7.6倍，落後一大截。

哈爾濱動力（01133）　目標價：13元　止蝕價：9元