Fundman睇市：鱷魚恤 不宜盲目跟炒

上星期，內地A股經歷了一年以來的最大一周跌幅，但昨日午市，滬綜指卻能夠拗腰重返3,000點心理關口樓上，本來以為港股調整亦會一同告一段落，殊不知淡友更踩多一腳，恒指以接近全日低位收市，跌195點，報24,027點，即月期指低水擴大到72點，收23,955點。

尋日大市成交縮到得番930億元，去到兩星期最低，可見建行（00939）、中行（03988）及工行（01398）3隻巨無霸齊齊伸手向股東要錢，對大市交投的影響力都咪話唔大，事關散戶要儲定彈藥以備供股，大戶就更加被餵到飽，再入市新錢相應減少，睇怕後市有機會再向23,500至23,900的橫行區進發。

國泰（00293）發盈喜，估計全年純利不少於125億元，收益包括出售香港空運貨站及港機工程（00044）的一次過收益21.65億元。

以國泰現價22.05元計，市值867億元。換句話說，當一○年全年業績出籠，市盈率將會得番6.9倍甚至更低，這一定吸引只係睇大利市上往績市盈率數字，就當做咗充分分析嘅股民。要知航空業周期性明顯，經濟復甦，載運量上升，下一個循環，是油價升，更多載運力投入，最後是工資成本上漲，航空公司利潤回落。

國泰盈喜難掩風險

國際油價今年於介乎67至87美元一桶上落，現處85美元水平，美國QE2催谷下，最近有向上突破之勢，國泰機長薪酬凍結多年，也有上漲壓力。分析員估計，國泰一一年業績會比一○年跌一成左右。要撇除盈利波動，不妨由市帳率看，現價1.78倍，過去十年介乎0.61倍及1.94倍，意味着國泰再升的空間唔大，或者有一成左右，但今次盈喜，就肯定說服唔到筆者去高追國泰。

炒到無嘢炒，十年唔發市嘅鱷魚恤（00122），尋日暴升兩成二，升0.14元，收報0.77元，或許唔少人以為鱷魚恤屬於零售股，仲係未炒過嗰隻！再睇大利市機，鱷魚恤往績市盈率2.9倍，又係一個散戶陷阱。

這家傳戶曉的鱷魚品牌，其實今時今日似收租股多過零售股，截至七月底止年度業績賺1.66億元（目前市值得4.75億元！），當中有八成八，即1.46億元係來自投資物業公平值重估收益，主要係鱷魚恤中心落成後的重估盈餘入帳。再睇成衣及相關配飾業務，分類項目即使由○九年的虧損3,183萬，轉為獲利502萬，但計及折舊及攤銷達1,433萬元，可見其盈利倚重收租多於衣履生意。

真正價值難以反映

市值4.75億元的鱷魚恤，資產淨值達9億元，當中包括鱷魚品牌、市值7億元的投資物業，加埋接近6,200萬的淨現金，現價折該幾近五成，睇落都唔可以話無炒作故事，可惜其價值係需要大股東提私有化，才有機會釋放出來。有時當市場上炒到無故事好炒，這類大折讓的老牌公司，往往可以三年唔發市，發市當三年，但要小心鑊氣一消，成交縮水隨時逃生無門，尤其過去十三年，鱷魚恤只得四年派息紀錄，想揸住收息收番成本都唔容易。