前日，日本央行終於出手進一步放寬貨幣政策，希望遏抑日圓升勢，但威力維持唔到半日，日圓已經掉頭再升過，日股尋日則再插3.6%。市場對央行投不信任票，似乎要令日圓轉弱，唔係搞搞量化寬鬆咁簡單，尤其目前世界處於零息年代，日本國民及企業購買海外債券或者持有高息貨幣賺利差的誘因大減，海外資金大舉回流已經唔係政府所能控制，而且今日日本問題並非企業借唔到錢，而係國內經濟唔好，企業貸款需求疲弱，即使將利率由1厘推到去零息，分別都唔係咁大。
港股昨日跌200點，收報20,536點。八月期指結算後，九月期指以20,320點埋單，大低水216點，即使考慮除息因素，仲係比理論值20,432點低過百點，消息話係因為有基金在現貨市場未能完成沽盤，轉去沽期指套戥所致。
近期有種怪現象，就係出業績嘅股份，唔係大生就係大死，前日瑞聲（02018）業績曝光而不跌，尋日隨即見大成交配合下，急升6.1%，收報14.24元。上市半年一直潛水的煤礦開採設備生產商國際煤機（01683），中期業績唔錯，毛利率改善，帶動純利升93.3%，股價尋日升9.5%，報4.5元，進一步逼近招股價4.88元水平。
供水收入增長可期
相對地，從事供水、基建及酒店管理等業務的粵海投資（00270），市場反應應該唔會咁極端，半年賺11.25億元，同比升11.4%，每股盈利18.1仙，美中不足是中期息不變，維持5仙。
粵投份成績表，各核心投資表現都相當唔錯，供水、物業投資及發展、百貨零售、酒店管理、發電，以至收費道路全部錄得增長。去年初，記得市場憧憬分拆酒店業務上市，炒過一陣子，可惜一直只聞樓梯響，股價悶足一年半，查實酒店管理每年稅前利潤6,000至6,500萬，即使畀佢二十倍市盈率，都係值13億左右，對比粵投市值235億，心理因素高於實際，反而供港東江水一年水費收入超過30億，上半年分部貢獻比重達七成二，才是最重要的現金牛，何況未來幾年供港水價仲會按年遞增。
跑輸大市非戰之罪
年初至今粵投股價累跌一成六，跑輸畀恒指同期的6%跌幅，史提芬認為並非粵投出問題，反而是基金經理口味轉變，近大半年集中「炒賣」內需及醫藥股等高beta股份所致。粵投一○年市盈率10.3倍或者盈利回報率9.7厘，預期派息率3.35厘，估值一啲都唔貴，另外由溢利覆蓋財務支出，查實有提高派息的空間，管理層如慷概點，相信對股價有振奮作用。