雖然賽前中國性感女星韓一菲承諾，若中國喺世界賽出線分組賽將拍全裸寫真，可惜一班球員卻唔爭氣，今晨唔只籃板球數目以26:44輸晒，最終更以76:84不敵波多黎各，C組出線形勢險峻，今晚對俄羅斯至少要贏7分先有機會出線，一班國手想睇全裸寫真就要醒定啲喇！

由於中國之前兩仗世界賽表現出色，剛同台灣當紅小生賀軍翔拍攝電影《活該你單身》嘅23歲前北京電影學院校花韓一菲揚言，若中國晉級淘汰賽，將會學世盃期間火速上位嘅巴拉圭性感「手機乳神」列基美，全裸出鏡拍攝大膽寫真，祝賀一班國家隊球員為國爭光咁話喎！其實呢位性感女神喺世盃期間已經參加過「足球寶貝」選舉，仲獲得全國亞軍，可想而知吸引力有幾大！

易建聯24分全場最高

中國隊尋晚場波有個好開始，由於波多黎各主將阿羅約因傷繼續缺陣，中國喺開賽初段憑王治郅勁入10分，一度領先波多黎各17:7，然而波多黎各之後憑効力小牛嘅巴利亞帶領下，半場已反超前中國44:37。下半場中國憑易建聯出色表現，曾經反超前波多黎各45:44，可惜之後無以為繼，最終以8分之差不敵波多黎各。易建聯今仗表現出色，取得全場最高24分，王治郅亦有17分。賽後中國3戰只得1勝2負，隨後仲要面對俄羅斯以及東道主土耳其兩大勁旅，出線形勢不容樂觀。

大使館請國家隊食飯

前日喺分組賽輪空嘅中國，獲中國駐土耳其大使館邀請參加晚宴。易建聯事後喺個人微博發放訊息，透露全隊喺訓練後去大使館食飯，準備大吃一餐，希望飲飽食醉之後好好瞓覺，準備對波多黎各嘅大戰，之後更上傳同球迷嘅合照。王治郅更表示由於好耐冇食中國菜，所以覺得餐晚宴好有「住家飯」感覺！