議息後，利率期貨顯示明年首季美息在0至0.25厘水平不變的機會率，由85%升到95%，未來半年加息的機會亦大大降低；睇完伯蛇嘅表演，最煩嘅應該係以中國為首的新興市場，事關美息短期無上升空間，資產泡沫全面升溫的新興國家，為免息差擴大熱錢進一步湧入，將失去加息壓抑物價嘅主導權，眼白白睇住資產價格泡沫愈吹愈大。

美電持續轉強惹來走資疑雲，拖累港股再跌264點，報21,347點，大市連續三日成交低於700億元，恒指已經連續跌穿10日、20日及50日平均線，尋日連100日線21,369點都穿埋，大市技術走勢明顯轉弱，既然○九年踏入倒數階段，無貨喺手嘅，不如提早放假，明年再搏殺過都未遲。

佳績推動創新高

中國燃氣（00384）出半年成績表，賺4.32億元，勁升4.84倍，刺激股價逆市創五十二周新高，最後收3.79元，升0.12元。睇份業績，來自衍生金融工具及投資物業重估的一次性收益，有1.83億元，是推動中燃業績勁升的主因，撇開有關因素，毛利9.34億元，升68.9%，主要是接駁收入及管道建設毛利都有長足之進，上半年表現整體嚟講唔錯。

內地新建房屋管道燃氣接駁率愈來愈高，對更方便及潔淨的燃氣需求與日俱增，上半年銷氣量升1.06倍（一般下半年天氣轉冷才是銷售旺季），超出唔少大行預測。中燃算係半隻內需股，亦係少數可跨省份經營的管道燃氣企業，與中石油（00857）及中石化（00386）的友好關係，保障了未來管道燃氣龍頭地位，缺點可能是估值從來都比業績走前一步，一一年預期市盈率已達18.6倍，基於正處高資本投入期，在派息政策上也相對保守，但考慮未來幾年是收割期，可訂止蝕入市，博一浪高於一浪。