煲呔曾漠視全球暖化問題，畀環保團體綠色和平譏諷為「氣候逃犯」，但煲呔曾一直做逃兵，死撐唔認錯。今個月二十二號係世界無車日，綠色和平再度挑戰煲呔曾所餘無幾嘅環保意識，呼籲煲呔曾響應。煲呔曾一向當環團嘅呼籲係耳邊風，睇嚟綠色和平應該同時將二十二號定為全城偵察氣候逃犯日，一旦發現煲呔曾坐CE車作短程接送，即刻全城通緝佢。
局長亦參與無車日，以教育局局長孫明揚嘅態度最投入，住跑馬地嘅佢，已經諗定當日提早出門，由屋企行去附近嘅巴士站搭一號巴士，喺置地廣場落車，再行上政府總部。
保安局局長李少光亦話由於家住沙田，當日朝早會坐公交上班，仲好大可能係坐港鐵過海，做人肉沙甸魚。住陽明山莊嘅發展局局長林鄭月娥就打算坐邨巴返工。環保局局長邱騰華透過發言人表示，二十二號會全日乘坐公交。