橙軍變慘軍？雖然雷霆球星杜蘭特尋日獲隊友撐場，齊齊換橙鞋轉新look出戰，不過「KD」反而錄得今季得分新低，累雷霆主場以86:100不敵小牛，唔知聽日杜蘭特仲會唔會繼續着「慘鞋」出戰活塞呢？

雷霆一班球員認真唔話得，尋日見大佬杜蘭特（Kevin Durant）首次着上一剔牌為佢全新打造嘅KD2橙色波鞋出戰，幾乎全隊都跟風轉新鞋，不過穿上新鞋嘅杜蘭特似乎唔係好慣，表現完全喺水準之下，全場竟只得12分創出今季新低，兼中斷連續9場射入25分或以上嘅NBA最長紀錄。

主場對活塞有力反彈

雖然杜蘭特尋日打得咁曳，但其實雷霆喺第4節一度領先75:71，最後輸波全因小牛嘅魯域斯基之後大發神威，喺最後8分鐘射入全場35分中嘅13分，成功反轉雷霆嘅新鞋派對。

聽日雷霆會繼續喺主場對活塞，芝士認為雷霆讓4分有力開上盤，事關活塞今季作客成績超曳，只得3勝10負，啱啱先分別以11分、8分輸畀火箭同黃蜂，呢場睇怕都係凶多吉少。