港府施政問題多多，根源或與「權力使人腐化」有關，煲呔曾就係呢句名言嘅實踐者之一。了解政府運作嘅人都知道，由政務司司長主持嘅「政策委員會」同「星級委員會」（Star Chamber），係掌控政策優先次序同內部資源分配嘅關鍵，任何局或部門想爭取資源，全部要經過呢兩個委員會協商批准，至可以提上行會同立法會。
呢兩個會一向由政務司司長做頭，變相可以平衡特首嘅獨斷獨行，不過煲呔曾最近一改過往十年嘅做法，取代唐唐做咗星級委員會嘅主持。據聞煲呔曾作出有關變動，表面上係好重視即將公布嘅施政報告提出嘅新建議，唔希望得唔到星級委員會配合而冇錢推行，所以要親自主持。
不過政府中人就質疑，煲呔曾其實係信唔過唐唐，想當年煲呔曾做財政司司長時，公開講過最憎人哋對佢草擬預算案嘅工作指指點點，依家自己反而做指指點點嘅人，再次證明權力真係會令人腐化。