李文斌（前左）同孫燕華（前右）近年開始養成運動習慣。
尋日係全民運動日，香港新活力青年智庫主席Edmond李文斌都喺彩虹道運動場舉辦三人籃球賽，有約三十支隊伍報名參加，希望繼續舉辦多啲同類型活動，可以推廣做運動嘅好處。不過，Edmond坦言，做地區工作最困難係要令人相信佢哋冇政治目的，為咗證明畀年輕人睇，佢哋會一直持續支持青年工作。
Edmond話小學時並唔係一個運動健將，反而係辯論隊成員，又話細個好專注讀書，小學嗰幾年均考獲頭五名內嘅優異成績，其後到外國升讀中學後亦甚少運動。不過，隨着佢為人父親，始發現運動非常重要，於是開始培養跑步習慣，仲有跑馬拉松添！至於會長孫燕華細個亦係書蟲，更可以話係「零運動」，但做咗會長之後喺耳濡目染下，近期都開始跑步同游水嘞！
