東網電視
更多新聞短片隨着區議會選舉臨近，內訌、分裂甚至退黨已經唔係泛民主派嘅專利，好似建仔最近至少有兩個人因不滿選舉安排而決定退黨，有個仲要怒剪黨員證添！
王詩展將自己嘅黨員證剪爛，表示已經退出建仔。
好似本身係建仔嘅西貢區議會副主席陳國旗，聽聞佢因為年紀問題，打算做埋今屆就退下火線，將富藍選區議席交畀曾喺○三年區選落敗嘅西貢委任區議員陳博智，自己就專心打理私人生意。
但據聞原本陳國旗諗住交棒畀建仔社區總幹事葉子弘，改由陳博智係頂上後來嘅決定。我哋分別問過建仔同葉子弘，但就出現咗兩個唔同版本故事，建仔話本身喺大專教書嘅葉子弘，因忙於教學工作而放棄區選；但葉子弘就話建仔突然抽起佢，都唔清楚發生咩事，對呢個安排非常失望，最後決定退黨。
有建仔中人透露，經過一段時間嘅觀察，發現葉子弘無論係個人質素同時間分配都滿足唔到黨嘅要求，所以決定換人。不過，適逢區議會將會取消委任制，建仔嘅安排難免令人猜想此舉係為確保黨內委任議員保住議席。
此外，現時喺東區區議會下耀東選區服務嘅建仔前黨員王詩展，早前就喺社交網站張貼有骨文章，鄭重聲明自己喺舊年五月已退出建仔，再冇蛇齋餅糉可以派，又暗示如果有人想要蛇齋餅糉，可以向當區區議員許嘉灝查詢。佢仲將自己嘅黨員證剪爛，上載埋退黨信，睇嚟真係幾嬲咁喎。
王詩展話同樹根不歡而散
我哋問過王詩展，佢話同身兼立法會議員嘅東區區議員鍾樹根不歡而散。咁點解咁不歡？樹根話王詩展年幾前跟許嘉灝做地區工作，但就唔多夾，期間試過有勞資糾紛，仲搞到去咗勞工處，最後佢哋講明唔支持王詩展出選，王咪自己退黨囉。不過，王詩展依家喺番許嘉灝嗰區做嘢，似乎係想參選爭奪議席，睇嚟新仇舊恨一觸即發嘞！
